Kənd təsərrüfatı Masallıda inkişafa doğru... - + FOTO ( AZpress.AZ - Əlihüseyn Şükürov )

Kənd təsərrüfatı Masallıda inkişafa doğru... + FOTO ( AZpress.AZ - Əlihüseyn Şükürov )

Masallı Rayon İcra Hakimiyyətinin iclas zalında geniş şura iclası keçirilmişdir. İclasda 2017-ci ilin birinci rübündə Masallı rayonunun sosial-iqtisadi inkişafının yekunları və qarşıda duran vəzifələr müzakirə edilmişdir.


Yığıncağı açan RİH başçısı cənab Rafil Hüseynov demişdir ki, ilin üç ayı respublikamız üçün uğurlu olmuşdur. Bu müddətdə ölkəmizin dayanıqlı inkişafı davam etmiş, sənayedə, kənd təsərrüfatında, insanların rifah halının yüksəlməsində, yeni iş yerlərinin yaradılmasında irəliyə doğru addımlar atılmışdır.
Cənab Prezident ölkədə sənaye istehsalı və kənd təsərrüfatının inkişafı ilə bağlı ətraflı danışmış, tövsiyə və göstərişlər vermişdir.


Məruzədə göstərilmişdir ki, bu müddətdə rayonumuzda da sosial-iqtisadi inkişaf göstəricilərinə görə uğurlu olmuş, yeni iş yerlərinin yaradılması, tikinti-quruculuq, abadlıq işlərinin sürəti üçün ardıcıl tədbirlər həyata keçirilmişdir. Natiq diqqəti ümumi uzunluğu 1,45 kilometr olan Digah küçəsinin yenidənqurulmasına, Heydər Əliyev prospektində 1000 metrə yaxın suötürücü kanalın çəkilişinə başlanmasına, Viləş çayının ətrafında Park-Bulvar kompleksində çay yatağının beton məcraya salınması, rayon məhkəməsi binasının tikilməsi, 100 yerlik uşaq bağçasının istifadəyə verilməsi, Masallı “Cümə məscidi”ndə təmir işlərinə başlanması, ölkə rəhbərinin rayonumuza ayırdığı vəsait hesabına 27 kommunal yaşayış binasının fasad və dam örtüklərində əsaslı təmir işlərinin başa çatdırılmasına, rayonun 2034-cü ilə qədər dövrü əhatə edən baş planın hazırlanması ilə bağlı işlərə və digər məsələlərə yönəlmişdir.


Natiq qeyd etmişdir ki, 2017-ci ilin birinci rübündə rayonun kənd, meşə, balıqçılıq təsərrüfatında 4,8 min manatlıq məhsul istehsal edilmişdir. Kənd təsərrüfatı müəssisələrində bir işçi üçün orta aylıq əmək haqqı 290 manat olmuşdur.


Rayonda iri buynuzlu mal-qaranın sayı 72330 başa, xırda buynuzlu mal-qaranın sayı 87051 başa çatmışdır. Birinci rübdə süd istehsalı 12216 tona, ət istehsalı 1540,8 tona, yumurta istehsalı 19480 min ədədə çatmışdır ki, bu da əvvəlki ilin müvafiq dövrü ilə müqayisədə xeyli çoxdur.


Hazırda yazlıq əkinlərin aparılması üçün şum və əkin işləri davam etdirilir. Belə ki, 13 mart 2017-ci il tarixinə 345 hektar paxlalı bitkilər, 795 hektar kartof, 709 hektar tərəvəz, 326 hektar bostan bitkiləri, 117 hektar çiyələk, 104 hektar yonca, 7,8 hektar meyvə bağı, 3,2 hektar findıq, 30,5 hektar sair bitkilər əkilmişdir. Həmçinin cari ildə 70 hektara yaxın çəltik, 32,5 hektara yaxın tütün əkilməsi nəzərdə tutulmuşdur.


Rayonda baramaçılığın inkişaf etdirilməsi istiqamətində işlərə başlanılmışdır. Rayonun doqquz ərazisində 4100 ədəd tut ağacından ibarət 23,1 hektar bağ mövcuddur. Baramaçılıqla məşğul olmaq istəyənlər üçün 20 qutu barama qurdu gətiriləcək.


Məruzəçi göstərmişdir ki, əvvəllər rayonun tərəvəzçilik və çayçılıq üzrə ixtisaslaşmış təsərrüfatlarında 6 min hektara yaxın sahədə tərəvəz, 3340 hektarda çay plantasiyaları və 3 min hektarda üzüm bağları salınmışdı. Buradan ildə 150 min ton tərəvəz, 10 min ton çay yarpağı və 26 min ton üzüm toplanırdı. Bu gün rayonda tərəvəz sahələri həcmi 2500 hektar, üzüm bagı isə 20 hektar təşkil edir. 100 hektarda çay plantasiyası salınmasına başlanmışdır.


Rayonda çayçılıq, üzümçülük və tərəvəzçilik sahələrində müəyyən işlər görülmüşdür. Keçmişdə mövcud olan 5 hektar çay sahəsi bərpa edilmiş və Kolatan kəndi ərazisində “Azərsun Holding” şirkəti tərəfindən 100 hektar sahə hazırlanmış və 50 hektara sahədə çay əkilmişdir.


Qızılağac kəndində “Azərsun Holding” tərəfindən 150 hektar müasir texnologiyalarla tərəvəz yetişdirilməsi üçün torpaq sahəsi ayrılmış, 100 hektarda əkin işləri aparılmışdır.


Viləşçay su anbarının ikinci növbəsinin tikintisini davam etdirmək zəruridir. Bəndin hündürlüyünün artırılması və digər tədbirlərin həyata keçirilməsi ilə faydalı həcmi 80 milyon kubmetr olacaq.


Mütəxəssislərin hesablamalarına görə Viləşçay su anbarının ikinci növbəsinin, eləcə də 20100 hektar əkin sahəsinin su təminatı üçün suvarma şəbəkəsi, 7800 hektar sahədə isə kollektor-drenaj şəbəkəsinin tikintisinin həyata keçirilməsi üçün təxminən 250 milyon manat vəsait tələb olunur. Təklif ölkə rəhbərliyi tərəfindən müsbət qiymətləndirilmiş və bu istiqamətdə hazırlıq işləri görülür.


Masallı rayon Mədəniyyət və Turizm şöbəsi cari ilin birinci rübündə əlamətdar günlərin qeyd edilməsi və bayram tədbirlərinin təşkilini daim diqqətdə saxlamışdır.


Rayonda fəaliyyət göstərən 33 turizm obyekti cari ilin üç ayında 4200 turist qəbul etmişdir ki, onun 510 nəfəri xarici vətəndaş olmuşdur.


Turizm Masallı rayonunun əsas inkişaf istiqamətlərindəndir və bu səbəbdən də daim diqqət mərkəzində saxlanılmalıdır.


Rayonda turizmin sürətli inkişafını təmin etdirmək məqsədi ilə Masallıda müalicəvi turizm şəhərciyinin salınması nəzərdə tutulur.


Azərbaycan Respublikasının Prezidenti cənab İlham Əliyevin 3 sentyabr 2016-cı il tarixdə Masallıya səfəri çərçivəsində ictimaiyyət nümayəndələri ilə görüşü zamanı rayon ərazisində Turizm istirahət kompleksinin tikintisi ilə bağlı məsələ qaldırılmış və təklif cənab Prezident tərəfindən bəyənilmişdir. Bu məqsədlə müvafiq məsləhətləşmələr aparılmış və tikinti layihə sənədlərinin hazırlanmasına başlanılmışdır.
Görülən işlərə baxmayaraq qarşıda bizi daha böyük və çətin işlər gözləyir.


Masallı şəhərində abadlıq işlərinin davam etdirilməsi və su-kanalizasiya sisteminin qurulmasının başa çatdırılması nəzərdə tutulur.


Masallıda aqrar sahənin inkişafı ilə bağlı tədbirlərin görülməsi, ixtisaslaşmanın sürətlə aparılması, tərəvəzçiliyin və kartofçuluğun inkişaf etdirilməsi, yeni çay plantasiyalarının salınması, istixanaların quraşdırılması, çiyələk təsərrüfatlarının və tədarük mərkəzlərinin yaradılması, tütünçülüyün və baramaçılığın inkişafı həlli vacib layihələrdəndir ki, bütün bunlar əhalinin sosial rifah halının yüksəlməsinə xidmət edir. Eyni zamanda Masallı şəhərində “Sənaye məhəlləsi” və “Yaşıl market” layihələrinin sürətlə reallaşdırılması diqqət mərkəzində olacaqdır.


Natiq Azərbaycan Respublikasının Prezidenti İlham Əliyev cənablarını əmin etmişdir ki, respublikamızın, o cümlədən Masallı rayonunun inkişafı naminə üzərimizə düşən vəzifələrin layiqincə yerinə yetirilməsi üçün bütün imkanlardan istifadə ediləcəkdir.


Məruzə ətrafında müzakirələrdə rayon kənd təsərrüfatı idarəsinin rəisi Seymur Nuriyev, Viləşçay Su Anbarı İstismarı İdarəsinin rəisi Mahir Əliyev, RİHB-nın Xırmandalı inzibati ərazi dairəsi üzrə nümayəndəsi Məhərrəm İbrahimov və başqaları çıxış etmişlər.


İclası yekunlaşdıran Masallı Rayon İcra Hakimiyyətinin başçısı cənab R. Hüseynov nitqində kənd təsərrüfatı işlərinin geniş vüsətini diqqətə çatdırmış, bəzi ərazilərdə torpaqların əkilməməsi, əkin sahələrinin suvarılması istiqamətində aparılan tədbirlərə, rayonda yaradılacaq yeni təsərrüfat sahələri, habelə təhsil, səhiyyə, uşaq müəssisələrinin, sosial obyektlərin tikilməsi məsələlərinə toxunmuş, tikinti-abadlıq işlərinin davam etdiriləcəyini söyləmişdir.


Şura iclasında müzakirə edilən məsələ ilə əlaqədar qərar qəbul edilmişdir.

 


ƏLİHÜSEYN ŞÜKÜROV.
Masallı. 

*************************************************************************** 
T Ə D B İ R L Ə R İ N İ Z İ N
   V  İ  D  E  O  +   F  O  T  O    
ç ə k i l i ş i 
  M E D İ A  DƏSTƏYİ

Tədbirlərinizin video-foto çəkilişini aparmaqla və media dəstəyi kimi , xəbər saytlarımızda yayımlamaq üçün
S İ F A R İ Ş L Ə R       Q Ə B U L     E D İ R İ K !
( Qiymətlər 60 azn-dən başlayır. Ödənişlərə görə vöen-qəbz və ya elektron vöen qəbz verilir.)
 
Əlaqə üçün : Telefon + WhatsApp : 050 331 1111
AZpress.AZ  informasiya agentliyi
www.azpress.az
***************************************************************************
 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !