Əflatun Amaşov Milli Məclisdə xanım Zaxarovanın davranışından danışdı -

Əflatun Amaşov Milli Məclisdə xanım Zaxarovanın davranışından danışdı

Milli Məclisin bu gün - 2 may 2017-ci il tarixli plenar iclasındakı çıxışım:

 

"Hörmətli Sədr, dəyərli həmkarlar, əziz media nümayəndələri!


Mən Sizin və hörmətli həmkarlarımızın fikirlərini tam dəstəkləyirəm. AŞPA-nın Türkiyəyə qarşı qərarını ciddi şəkildə pisləyirəm. Bununla bağlı parlamentin çıxaracağı qərara səs verəcəm. Ancaq mən burada başqa bir məsələ ilə bağlı çıxış etmək istərdim.


Son günlər ölkəmizin ictimai fikrində daha çox müzakirə edilən məsələlərdən biri də Rusiyanın Xarici İşlər Nazirliyinin mətbuat xidmətinin rəhbəri Mariya Zaxarovanın davranışıdır. Onun azərbaycanlı jurnalistin sualına cavabı etik normaların, həmçinin vəzifə səlahiyyətlərinin kobud sürətdə aşılmasıdır. Bildiyiniz kimi, xanım Zaxarova Dağlıq Qarabağdakı separatçı rejim tərəfindən girovda saxlanılan Rusiya vətəndaşı Dilqəm Əsgərovla bağlı suala ümumən Azərbaycan jurnalistlərini aşağılayaraq cavab verib. Bu davranış media ictimaiyyətində təəccüb, təəssüf və ikrah hissi doğurub. Mətbuat Şurasının yaydığı bəyanatda bu məqam vurğulandı. Mən bu salondan ölkə jurnalistlərinin mövqeyini bir daha səsləndirirəm və hesab edirəm ki, məsələyə parlament səviyyəsində də sərt münasibət bildirilməlidir.


Çünki xanım Zaxarovanın fikirlərində aşkar nəzərə çarpan təzyiq, təhdid və təhqir meylləri onun ümumən Dağlıq Qarabağ həqiqətlərinə biganəliyindən, məsələnin həssaslığına əhəmiyyətsiz yanaşmasından qaynaqlanır. Halbuki erməni əsirliyində saxlanılan Rusiya vətəndaşı Dilqəm Əsgərovun taleyi Azərbaycanı düşündürdüyü qədər Rusiyanı və bu ölkənin cəmiyyətini də düşündürməlidir. Ancaq görünən budur ki, Zaxarova və zaxarovalar buna qarşıdır. Onlar şəxsi hiss və baxışlarını peşəkar müstəviyə daşımaqdan əl çəkmirlər. Nəzərə alsaq ki, Dağlıq Qarabağ münaqişəsi ilə bağlı hər hansı durum ATƏT-in Minsk Qrupunun həmsədri kimi Rusiyanın da maraq dairəsindədir, ölkənin münaqişəyə dair həssaslığı Mariya Zaxarovanın leksikonundakı tonda olmamalıdır.
Bəli, Azərbaycan və Rusiya dövlətləri arasındakı əlaqələr yüksək səviyyədədir. Bunu zaxarovalara görə korlamaq düzgün deyildir. Sadəcə Rusiya XİN təmsilçisinin Dilqəm Əsgərovun taleyi qismində Azərbaycanın haqq işi ilə bağlı suala biganəliyinə seyrçi qalmaq da düzgün deyildir. Bir daha bildirirəm ki, Azərbaycan parlamenti də məsələyə münasibətini bildirməlidir. Çünki xanım diplomatın ortaya qoyuduğu mövqe, yəni Dağlıq Qarabağ münaqişəsi ilə əlaqəli suala gözlənilməz cavabı ikitərəfli münasibətlərin hazırkı ahənginə qətiyyən uyğun gəlmir. Bunu biz düşünürüksə, Rusiya tərəfi də düşünməlidir.


Diqqətinizə görə təşəkkür edirəm!" 

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !