Ağcabədidə Yaponiya hökumətinin dəstəyi ilə inşa edilən tibb məntəqəsi istifadəyə verilib - +FOTOLAR ( AZpress.AZ - Mais İbrahimov, Ağcabədi )

Ağcabədidə Yaponiya hökumətinin dəstəyi ilə inşa edilən tibb məntəqəsi istifadəyə verilib +FOTOLAR ( AZpress.AZ - Mais İbrahimov, Ağcabədi )

Noyabrın 6-da Yaponiya hökumətinin “Ot kökləri və insan təhlükəsizliyi qrant yardımı” proqramı çərçivəsində Ağcabədi rayonunun Kəbirli kəndində inşa edilən tibb məntəqəsi istifadəyə verilib.
AZpress.AZ-ın bölgə müxbiri xəbər verir ki, bu münasibətlə keçirilən mərasimdə çıxış edən Yaponiyanın Azərbaycandakı səfirinin müşaviri Keisuke Yamanaka ölkəsinin Azərbaycanda reallaşdırdığı layihələr barədə məlumat verib. Bildirib ki, bələdiyyələr, tibb institutları və qeyri hökumət təşkilatlarının təqdim etdiyi “Ot kökləri və İnsan Təhlükəsizliyi Qrant yardımı Proqramı” layihələrinin məqsədi Azərbaycan xalqının yaşayış standartlarının yaxşılaşdırılmasını dəstəkləməkdir. Bu tipli layihələr yoxsulluğun azaldılması, sosial müdafiə, infrastruktur, səhiyyə və gəlirlərin yüksəldilməsi sahələrində həyata keçirilə bilər. Hazırki layihə də daxil olmaqla, indiyədək ümumi dəyəri 19 milyon 983 min 599 ABŞ dolları olan 234 layihə üzrə qrant müqaviləsi imzalanıb.
Diqqətə çatdırılıb ki, Yaponiya hökuməti Azərbaycan Respublikasının davamlı inkişafına yönəlmiş əməkdaşlığa böyük əhəmiyyət verir. Yaponiyanın Azərbaycana ayırdığı İnkişaf üçün Rəsmi Yardım iqtisadi infrastrukturun yaxşılaşdırılması, kənd təsərrüfatı, sosial sahə, mədəniyyət və insan resurslarının inkişafı kimi geniş sahələri əhatə etməklə, ümumi məbləği 1,1 milyard ABŞ dollarını keçib.
Yaponiya hökuməti indiyədək Ağcabədi rayonunda altı layihə həyata keçirib və bu yeddinci layihədir. Ümumi məbləği 90,901 ABŞ dolları təşkil edən layihənin məqsədi Ağcabədi rayonunun Kəbirli kəndinin sakinlərinin tibbi xidmətdən istifadəsi üçün şərait yaratmaqdır. Layihədən təqribən 10 mindən çox insan faydalanacaqdır.
Mərasimdə çıxış edən Ağcabədi rayon İcra Hakimiyyəti başçısının müavini Naibə Mustafayeva iki dost ölkə olan Azərbaycan və Yaponiya arasında əlaqələrin uğurla inkişaf etdiyini vurğulayaraq, həyata keçirilən layihələrə görə Yaponiya hökumətinə minnətdarlığını ifadə edib.
Tədbir iştirakçıları sonra tibb məntəqəsinin həyətində ağac əkib, binada yaradılan şəraitlə tanış olublar.

 

 

 

! © Müəllif hüquqları qorunur ! Məlumatdan istifadə etdikdə istinad mütləqdir ! Məlumat internet səhifələrində istifadə edildikdə müvafiq keçidin qoyulması mütləqdir !!!  

ŞƏRHLƏR :

 

( Sos.şəbəkədə gedən yazışmanin FOTO-ƏKSİ. Məzmun və qramatik səhvlərə görə redaksiya məsuliyyət daşımır )