SƏNƏ ÜRƏYİMLƏ SƏCDƏ EDİRƏM - - Şirinxanım Kərimbəyli ŞADİMAN

SƏNƏ ÜRƏYİMLƏ SƏCDƏ EDİRƏM - Şirinxanım Kərimbəyli ŞADİMAN

SƏNƏ ÜRƏYİMLƏ SƏCDƏ EDİRƏM

 

Sənə ürəyimlə səcdə edirəm,
Ürəyin işini əl görə bilməz.
Hər gün dərgahına min yol gedirəm,
Canın səcdəsini dil görə bilməz.

 

Bütün kainatlar əlində çıraq,
Söndürüb yandıran sənsən çırağı.
Sənin varlığından ruh verir soraq,
Səni duymayanlar görmür irağı.

 

Vicdanı dinlədib danışdıran sən,
Vicdan dediyimiz Rəbbin özüdür.
Xeyiri şər ilə yarışdıran sən,
Canda kainatın yaşam közüdür.

 

Dinlərlə insana ağıl verənlər,
Beyin sandığına yerləşib ağıl.
Dini siyasətə ölçü görənlər,
Əsarət artıqca kütləşib ağıl.

 

Biz ki, Yaradanın zərrələriyik,
Zərrə çoxaldıqca enerji artır.
Zaman oyununda ömrün zəriyik,
Udan zirvələrdə, uduzan batır.

 

Bizi mövhümatla yatızdıranlar,
Hiylənin ipini kəsər Yaradan.
Adama səcdəyə otuzduranlar,
Yalana son verin, küsər Yaradan.

 

Təbiət Yaradan özü deyilmi?
Onun varlığına çirkab atmayaq.
Canda İlahinin izi deyilmi?
Yalanı, fitnəni ona çatmayaq.

 

Hər varlıq içində yaşayan Tanrı,
Səni dərk edəndə aliləşirik.
Canda kimliyini daşıyan Tanrı,
Səni duymayanda aha düşürük.

 

Sənə ürəyimlə səcdə edirəm,
Ürəyin işini əl görə bilməz.
Hər gün dərgahına min yol gedirəm,
Canın səcdəsini dil görə bilməz.

 

                                                                                     ***

 

 

YENİ İL DUASI

 

Ey canın işığı, ey Yaradanım,
Vaxtın təkərini fırladır anım.
Saniyələr ömrü çəkib aparır,
İçimə min ağrı töküb aparır.
Sənə ünvanlanıb dildə sözümüz,
Sənin şimşəyini alır közümüz.
Yenə köhnə ili yola salırıq,
Yenə intizara möhtac qalırıq.
Nə olar sındırma ümidimizi,
İşğal sınağıyla öldürmə bizi.
Sənin əlindədir düşmənə sitəm,
Sal onun evinə bir qanlı matəm.
Bizi xar edənlər batıb yox olsun,
Vətəni sevənlər artıb çox olsun!
Özün çətinə sal talançıları,
Ölkəyə zülüm edən yalançıları!...
Milləti aclıqla sınağa çəkmə,
Sərvəti nankorun başına tökmə.
Bir tikə çörəyə möhtac olanlar,
Ağrıya, acıya əlac olanlar,
Sabaha ümidi səndə arayır,
Keçir ələyindən iblisi ayır.
Bizi də bəxtiyar xalqlardan elə,
Sənə ümidimiz dönməsin yelə.
Qarabağ adında ağrı-acımız,
Neylək sənə qalıb tək əlacımız!
Düşmənin ağlını qəfildən çaşdır,
İçində ağrını sellərtək daşdır.
Özünə qarışsın başı daima,
Axsın gözlərindən yaşı daima.
Yağıya əyilən qoy batsın yerə,
Udsun bədənini ən dərin dərə.
Qapıb qılıncını hayqırsın Ərlər,
Dillərin əzbəri olsun hünərlər...
Heç boyun əyməsin işğala Ölkəm,
Kəs xainnin ömrün, eylə bəxti kəm!
Ulat içimizdə o yatmış Qurdu,
QƏLƏBƏ xəbərin gətirsin ORDU!

 

 

 

! © Müəllif hüquqları qorunur ! Məlumatdan istifadə etdikdə istinad mütləqdir ! Məlumat internet səhifələrində istifadə edildikdə müvafiq keçidin qoyulması mütləqdir !!!  

ŞƏRHLƏR :

 

( Sos.şəbəkədə gedən yazışmanin FOTO-ƏKSİ. Məzmun və qramatik səhvlərə görə redaksiya məsuliyyət daşımır )