AzInTelecom MMC-nin təşəbbüsü ilə İT sahəsi üzrə ödənişsiz vebinar keçirildi - - FOTO

“AzInTelecom” MMC-nin təşəbbüsü ilə İT sahəsi üzrə ödənişsiz vebinar keçirildi - FOTO

Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən “AzInTelecom” MMC-nin təşəbbüsü, “Microsoft Azərbaycan” və “Kaspersky” şirkətlərinin iştirakı ilə “İKT əsaslarından bulud texnologiyalarına” adlı ödənişsiz maarifləndirici vebinar keçirilib.

Vebinarın təşkilində əsas məqsəd xüsusi karantin rejimi dövründə tələbələrin, eləcə də müxtəlif peşə sahiblərinin İKT sahəsində, xüsusilə bulud texnologiyaları üzrə yeni biliklərə yiyələnməsinə şərait yaratmaqdır.

Rəqəmsal platformada baş tutan tədbirdə təşkilatçılar informasiya texnologiyalarının, kibertəhlükəsizliyin əsasları, bulud texnologiyaları barədə təqdimatlarla çıxış ediblər.

Vebinarda “AzInTelecom”un Kommersiya departamentinin rəhbəri Ruslan Əliyev bildirib ki, İT sahəsi üzrə vebinarların keçirilməsi Azərbaycanda hər kəsi müasir dünya trendləri ilə uyğunlaşmağa həvəsləndirmək, rəqəmsal texnologiyalar barədə məlumatlandırmaq baxımından çox önəmlidir. O, bu təşəbbüsün faydalı nəticələrə səbəb olacağını söyləyib.

“Microsoft Azərbaycan” adından çıxış edən Qaçay Mirzəyev vebinar iştirakçılarına informasiya texnologiyaları və bu sektordakı yeniliklər haqqında ətraflı məlumat verib.

“Kaspersky”nin rəsmi təmsilçisi Müşfiq Məmmədov isə öz təqdimatında kibertəhlükəsizliyin vacib aspektlərindən bəhs edib.

Sonda spikerlər iştirakçıların suallarını cavablandırıblar.

Qeyd edək ki, “AzInTelecom” MMC tərəfindən bu kimi tədbirlərin yaxın gələcəkdə də təşkili nəzərdə tutulur.

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !