Diaspor rəhbərləri soydaşlarımızı sərhədlər açılanadək yaşayış yerlərini tərk etməməyə çağırıb - - FOTO

Diaspor rəhbərləri soydaşlarımızı sərhədlər açılanadək yaşayış yerlərini tərk etməməyə çağırıb - FOTO

Diasporla İş üzrə Dövlət Komitəsinin təşəbbüsü əsasında müxtəlif ölkələrdə fəaliyyət göstərən Azərbaycan diasporunun rəhbərləri və nümayəndələri ilə videokonfranslar davam edir.

Növbəti videokonfrans Rusiyanın paytaxtı və bir sıra regionlarında fəaliyyət göstərən Azərbaycan diasporunun rəhbərləri və nümayəndələrinin iştirakı ilə təşkil edilib.

Virtual tədbirdə Rusiya Vəkillər Gildiyasının üzvü, Moskva şəhərində yaşayan vəkil Ələkbər Qarayev, Perm azərbaycanlılarının Milli-Mədəni Muxtariyyətinin sədri Çingiz İsayev, "Birlik" Surqut azərbaycanlılarının Milli-Mədəni Muxtariyyətinin sədri Azad Seyidov, "Kurqan vilayətində Azərbaycan diasporunun rəhbəri Niftulla Niftullayev, Zabaykalsk diyarının İctimai Palatasının sədr müavini Ələddin Məmmədov, Çelyabinsk vilayətinin "Ozan" və "Azərbaycan" ictimai təşkilatlarının sədrləri Rəfael Quliyev və Ərşad Xankişiyev, Xantı-Mansisk Muxtar Dairəsinin Nijnevartovsk şəhərinin "Birlik" Azərbaycan regional ictimai təşkilatının sədri Elşən Ağayev, "Azərbaycanlılar" regional ictimai təşkilatının sədri Arzu İsmayılov, Dövlət Komitəsinin məsul əməkdaşları Ruslan Quliyev, Tural Səfərov və Zaur Ramazanov iştirak ediblər.

Müzakirələr zamanı pandemiya dövründə həmvətənlərimizin qarşılaşdıqları problemlərə diqqət cəlb olunub. Diaspor rəhbərləri soydaşlarımızı ölkələrarası sərhədlər açılana qədər daimi və ya müvəqqəti məskunlaşdıqları yaşayış yerlərini tərk etməməyə, Rusiya-Azərbaycan sərhədlərində toplaşmamağa çağırıblar.

Videokonfransda Rusiyanın regionlarında yeni konsulluqların açılmasının zəruri olduğu vurğulanıb, federal dairələr üzrə azərbaycanlıların koordinasiya şuralarının yaradılmasının əhəmiyyəti və s. məsələlər ətrafında geniş fikir mübadiləsi aparılıb.

Sonda bu cür görüşlərin əhəmiyyəti qeyd olunub və davamlı keçirilməsinin məqsədəuyğun olduğu bildirilib.
 

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !