Biz birlikdə güclüyük şüarına uyğun Azərbaycan Könüllülərinin fəaliyyəti -

“Biz birlikdə güclüyük” şüarına uyğun Azərbaycan Könüllülərinin fəaliyyəti

 Dünyada və ölkəmizdə yaranan yeni növ Koronavirus (COVID-19) pandemiyası ilə əlaqədar ölkəmizdə xüsusi tədbirlər həyata keçirilib və keçirilməyə davam edir.
Cənab Prezident İlham Əliyev tərəfindən vaxtında görülən tədbirlər nəticəsində vəziyyəti nəzarət altında saxlamaq mümkün olub. Bu çətin günlərdə dövlət başçısı tərəfindən səsləndirilən "Biz birlikdə güclüyük" şüarı bu gün uşaqdan-böyüyə hər kəsin həyat devizinə çevrilib.
“Biz birlikdə güclüyük!” şüarı əsasında Azərbaycan Könüllülərinin Əlaqələndirmə Mərkəzi tərəfindən respublikanın demək olar ki, bütün şəhər və rayonlarında könüllülər səfərbər olunaraq, kampaniyalar və aksiyalar həyata keçirilib.
“Böyüklərimizi qoruyaq!”, “Könüllü qonşu” və “Könüllü donor” aksiyalarında 57 şəhər və rayonda 201 könüllü əlaqələndirici və 1545 nəfər daimi fəaliyyətdə olan könüllü 11 mindən çox yaşlı şəxsə və aztəminatlı ailəyə sosial xidmət göstərib.
“Bir-birimizi qoruyaq!” adlı kampaniya çərçivəsində isə könüllülər respublikamızın şəhər və rayonlarında, o cümlədən Bakının 12 rayonunda fəaliyyətə başlayıblar.
Kampaniyanın məqsədi karantin rejiminin yumşaldılması ilə əlaqədar insanların kütləvi toplaşdığı yerlərdə sosial məsafə və digər davranış qaydaları barədə ictimai maarifləndirmənin aparılmasıdır.
Kampaniyanın ilk günləri könüllülər daha çox təşviqat xarakterli maarifləndirmə fəaliyyəti aparıb, küçədə maskasız gəzən şəxslərə tibbi maska və əlcəklər təqdim edib, maska taxmağın vacibliyi və istifadə qaydaları barədə məlumat verib, insanların çox toplaşdığı yerlərdə sosial məsafənin saxlanılmasını təmin edib, obyektlərə daxil olanların əllərini və mağazalardakı ödəmə terminallarını dezinfeksiya ediblər.
Keçirilən aksiya çərçivəsində, əhalinin çox olduğu müxtəlif məkanlarda – restoran, kafe, parklarda könüllülər üzərində koronavirusdan qorunmaq məqsədilə hazırlanan təbliğat və təşviqat yazıları əks olunmuş stikerlər yapışdırıblar. Belə ki, karantin qaydalarına riayət olunan məkanların girişlərinə “Burada qaydalara əməl olunur” və “Nümunəvi obyekt”, ictimai nəqliyyatda və parklarda, şəxsi avtomobillərdə, insanların köynəklərində “aralı əyləşin, sağlam olun”, “məsafə saxla”, “bir birimizi qoruyaq”, “sağlamlıq məsafəsi saxlayın” yazılı xüsusi stikerlər yapışdırılır, həmçinin insanlar arasında maarifləndirmə aparılır.
“Bir-birimizi qoruyaq!” adlı kampaniyanın məqsədi karantin rejiminin yumşaldılması ilə əlaqədar insanların kütləvi toplaşdığı yerlərdə sosial məsafə və digər davranış qaydaları barədə ictimai maarifləndirmənin aparılması, həm xəstəliyin yayılmasının qarşısının alınması üçün vaxtında səmərəli tədbirlər həyata keçirən dövlətimizə, həm də koronavirus (COVID-19) pandemiyası ilə mübarizədə gecə-gündüz çalışan vətəndaşlarımıza könüllülərin dəstəyini nümayiş etdirməkdən ibarətdir.
Eyni zamanda, sakinləri Nazirlər Kabineti yanında Operativ Qərargahın və Ümumdünya Səhiyyə Təşkilatının tövsiyə etdiyi qaydalara diqqət yetirməyə, zərurət olmadan evdən çıxmamağa çağırıblar.
Qeyd edim ki, yeni növ koronavirus infeksiyasının yarada biləcəyi təhlükə ilə mübarizədə dövlət tərəfindən həyata keçirilən tədbirlərin dəstəklənməsi məqsədilə 27 mart 2020-ci il tarixində formalaşan və fəaliyyətində "ASAN Könüllüləri" Təşkilatı, "Regional İnkişaf" İctimai Birliyi, "Bir Könüllü" Tələbələrin Əməkdaşlığı İctimai Birliyi, "Könüllü DOST" Proqramı, "Aqrar İnkişaf Könüllüləri" İctimai Birliyi, "Nəqliyyat Könüllüləri" Proqramı, "Formula 1 Azərbaycan Qran Prisi" Könüllülük Proqramı, "Miqrasiya Könüllüsü" İctimai Birliyi, "Könüllü gömrükçü" Dəstəsi, "Turizm Könüllüləri" Təşkilatı, "Ekokönüllüləri" Qrupu, "AFFA və Avro-2020" Könüllülər Proqramı, "Gənc Könüllülər" Hərəkatı və digər təşkilat və hərəkatların iştirak etdiyi Mərkəzin işinin əlaqələndirilməsi Azərbaycan Respublikası Gənclər Fondu tərəfindən həyata keçirilir.
Azərbaycan Prezidentinin “Biz birlikdə güclüyük!” şüarını rəhbər tutan Mərkəz respublikanın demək olar ki, bütün şəhər və rayonlarında könüllüləri səfərbər edib.


Binəqədi Gənclər Evinin direktoru
Ələkbər Mustafayev

 
 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !