Babayan: Mən və başqaları erməni sakinlərinin Azərbaycana inteqrasiyasının əleyhinə idik

Aprelin 7-də Bakı Hərbi Məhkəməsində davam edən məhkəmə prosesi zamanı təqsirləndirilən David Babayan əvvəllər işğal olunmuş ərazilərdə yaşayan ermənilərin Azərbaycana inteqrasiyasının əleyhinə olduğunu etiraf edib.

Azərtac xəbər verir ki, dövlət ittihamçısının sualına cavab olaraq D.Babayan belə bir inteqrasiyanı qeyri-mümkün hesab etdiyini bildirib.

Təqsirləndirilən şəxs həmçinin təsdiq edib ki, iş üzrə digər təqsirləndirilən şəxslər, o cümlədən Arayik Arutyunyan və Ruben Vardyan, eləcə də özünü elan edən rejimin digər “məmurları” onun mövqeyini bölüşürlər.

“Heç bir “məmur” belə inteqrasiya perspektivini görmədi” dedi.

Xatırladaq ki, sülh və bəşəriyyət əleyhinə cinayətlər, hərbi cinayətlər, o cümlədən təcavüzkar müharibənin hazırlanması və aparılması, soyqırımı, müharibə qanun və qaydalarının pozulması, habelə terrorizm, terrorizmin maliyyələşdirilməsi, hakimiyyəti zorakılıqla ələ keçirmə və saxlama və bir çox başqa cinayətlərdə ittiham olunan Ermənistan vətəndaşlarının məhkəməsi davam edir.