YADA DÜŞƏR XATİRƏLƏR

(AZpressAZ-in arxivindən: 2023-cü il)

Seymur Şahbazzadə:

Komsomola keçdiyim vaxt həyat gözəl, hava sərin, səma təmiz, ovqat şən idi

Bu asma təqvim vərəqindəki tarixdə mən birinci sinfə təzə gedirdim. Qardaşım onuncu sinifdə oxuyurdu, pencəyinin yaxasında komsomolçu nişanı vardı və onuncuların yaşına, boyuna qibtə elədiyim kimi, sinələrində parıldayan o nişana da həsədlə baxırdım.

Mən onuncu sinifdə oxuyanda dövr başqa idi: sovet komsomolçularının son nəsli kommunizm işinə xəyanət etmişdi, sələflərinin qurduğu sovet ölkəsini və sosializm quruluşunu imperialistlərə, mafiozlara, millətçilərə satmışdırlar, daha heç nəyin ləzzəti qalmamışdı və biz artıq sinəmizə komsomolçu nişanı taxmırdıq.

Nə vaxtsa üzvü olduğum bu yeganə siyasi təşkilata isə mən 85-ci ilin aprelində keçmişdim. Həyat gözəl idi, hava sərin, səma təmiz, ovqat şən, işıqlı, ümid dolu...

Məmməd arazın bu sətirləri yadınızdadırmı, "komsomola keçdiyim gün xatirimdədir, o günlərin xatirəsi indi bal dadır"?!.