Beynəlxalq Cüdo Federasiyası (IJF) Azərbaycanın paytaxtında keçirilən nüfuzlu “Böyük Dəbilqə” turnirinə ən yüksək qiymət verib.

Bu barədə Federasiyanın rəsmi portalında paylaşılıb.

“Tədbirin təşkili bütün aspektlərdə qüsursuz idi. Azərbaycan tərəfi ən yüksək peşəkarlıq nümayiş etdirərək, 36 ölkənin idmançıları üçün ideal şərait yaradıb ki, bu da onlara özlərini ən yaxşı tərəfdən göstərməyə və qiymətli reytinq xalları qazanmağa imkan verib. “Azərbaycan Cüdo Federasiyası və turnirin təşkilində əməyi olan hər kəs bu əlamətdar idman tədbirinə ev sahibliyi etdiyi üçün ən yüksək tərifə layiqdir”, - IJF-in bəyanatında vurğulanır.

Federasiya Yaponiya və Azərbaycan komandalarının təsirli çıxışlarını xüsusi qeyd edərək, onları turnirin bəzi liderləri kimi tanıyıb.

Beynəlxalq ekspertlər də Azərbaycan Cüdo Federasiyasının sosial missiyasını yüksək qiymətləndirərək, onun bütün sosial qrupların, o cümlədən xüsusi qayğıya ehtiyacı olan uşaqların inteqrasiyası istiqamətində uğurlu fəaliyyətini qeyd ediblər.

Fevralın 14-16-da Milli Gimnastika Arenasında Böyük Dəbilqə turniri baş tutub. 32 idmançı ilə təmsil olunan Azərbaycan komandası müxtəlif nominasiyalar üzrə beş medal qazanıb.