Dövlət Vergi Xidmətinin rəisi AHK İmpuls tədbirinin qonağı olub - FOTO

Dövlət Vergi Xidmətinin rəisi AHK İmpuls tədbirinin qonağı olub - FOTO

Mayın 11-də Alman-Azərbaycan Xarici Ticarət Palatası (AHK Azərbaycan) tərəfindən üzv şirkətlər üçün “PAŞA Property Management” MMC-nin sponsorluğu ilə növbəti AHK İmpuls tədbiri təşkil edilib. Tədbirin fəxri qonağı, Azərbaycan Respublikasının İqtisadiyyat Nazirliyi yanında Dövlət Vergi Xidmətinin (DVX) rəisi Orxan Nəzərli “Azərbaycan iqtisadiyyatı üçün yeni çağırışlar: davamlı inkişafa xidmət edən vergi islahatları” mövzusunda çıxış edib.

Azərbaycanın vergi sistemi, aparılan islahatlar, milli vergi qanunvericiliyinin və inzibatçılığının təkmilləşdirilməsi mövzusuna həsr olunmuş tədbirdə açılış nitqi ilə çıxış edən AHK Azərbaycanın İdarə Heyətinin sədri Fərid İsayev görüşdə iştirak edən qonaqları, o cümlədən diplomatik missiya nümayəndələrini salamlayaraq dövlət-özəl tərəfdaşlığının genişləndirilməsinin vacibliyini qeyd edib, dialoq mühitinin inkişafında işgüzar dairələrlə dövlət qurumları arasında keçirilən görüşlərin əhəmiyyətini vurğulayıb.

DVX rəisi O. Nəzərli son illərdə vergi sistemində aparılan islahatlar, “kölgə iqtisadiyyatı”nın minimallaşdırılması istiqamətində həyata keçirilən siyasət, haqsız rəqabətin qarşısının alınması, əmtəəsiz və riskli əməliyyatlar aparan vergi ödəyicilərinin fəaliyyətinə nəzarətin gücləndirilməsi, leqal fəaliyyətin stimullaşdırılması mexanizmlərinin tətbiqi ilə bağlı görülən işlər barədə danışıb. O. Nəzərli Palata üzvlərini ortamüddətli dövr üçün vergi sisteminin inkişaf strategiyası, həyata keçirilməsi nəzərdə tutulan vergi siyasətinin əsas istiqamətləri, DVX-nin rəqəmsal platformasının təkmilləşdirilməsi, vergi ödəyiciləri üçün nəzərdə tutulan yeni elektron xidmətlər və rəqəmsal layihələr barədə məlumatlandırıb.

DVX rəhbərliyinin sağlam dialoqun qurulması, qərarların qəbulunda ictimai iştirakçılığın təmin edilməsində maraqlı olduğunu vurğulayan O. Nəzərli, AHK Azərbaycan ilə əməkdaşlığın dövlət, sahibkar və ictimaiyyət arasında dialoqa töhfə verəcəyinə əmin olduğunu bildirib.

AHK Azərbaycanın icraçı direktoru Tobias Baumannın moderatorluğu ilə keçirilən tədbirdə DVX rəisi Palata üzvlərinin suallarını cavablandırıb və özəl sektor nümayəndələri ilə yaradılan birbaşa dialoq imkanı üçün təşkilatçılara minnətdarlığını ifadə edib. Tədbir müzakirələr və şəbəkədaxili danışıqlar şəraitində yekunlaşıb.

 

 ( Sos.şəbəkədə gedən yazışmanin FOTO-ƏKSİndə olan qramatik və məzmun səhvlərinə görə redaksiya məsuliyyət daşımır ) 
 Bütün hüquqlar qorunur ! Xəbərlərdən istifadə edərkən    www.AZpress.AZ    saytına istinad zəruridir !
BAŞ REDAKTOR :  XEYRANSA  İSMAYILOVA 
(İsmayılova Xeyransa Eldəniz qızı)
WhatsApp:     https://wa.me/994515203020
 e-mail:  [email protected]