Fevralın 9-da Vətən müharibəsi şəhidi Əliyev Ramid Kamal oğlunun doğum günündə Lənkəran Şəhər İcra Hakimiyyətinin əməkdaşları, habelə yerli ictimaiyyətin nümayəndələri rayonun İstisu qəsəbəsində şəhid ailəsinə baş çəkib, qəhrəman övladımızın məzarını ziyarət edərək, önünə gül dəstələri düzüb və ruhuna dualar oxuyublar.

Qeyd edək ki, şəhid R.Əliyev 9 fevral 1996-cı ildə Lənkəran rayonunun Şağlaser kəndində anadan olub. Atası İstisu qəsəbə tam orta məktəbinin coğrafiya müəllimi olub.
2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Ramid Əliyev Cəbrayıl və Qubadlı döyüşlərində iştirak edib. 26 oktyabr 2020-ci il tarixdə Qubadlı istiqamətində düşmən tərəfindən atılan artilleriya mərmisi nəticəsində şəhid olub. Onun nəşi Lənkərana gətirilərək İstisu qəsəbə qəbirstanlığında dəfn edilib. 

Şəhid R.Əliyev Vətən müharibəsində göstərdiyi  şücaətinə görə ölümündən sonra Ali Baş Komandanın sərəncamları ilə “Vətən uğrunda”, “Cəsur döyüşçü”, “Cəbrayılın azad olunmasına görə” və “Qubadlının azad olunmasına görə” medalları ilə təltif olunub.