Mərakeşdə boks üzrə və 2023-cü il mövsümünün ilk beynəlxalq turniri olan Qızıl kəmər seriyası davam edir. Azərbaycan boksçularının da qatıldığı bu turnir artıq finişə çatıb. Bu gün turnirdə yarımfinal döyüşləri keçirilib və bununla da finalçılar müəyyənləşib. Azərbaycan Boks Federasiyasından verilən məlumata görə, yarımfinala yüksələn 5 təmsilçimizdən 3-ü - Ümid Rüstəmov (57 kq), Nəbi İsgəndərov (67 kq) və Alfonso Dominqes (86 kq) daha yaxşı döyüşərək finala yüksəlib. 

Qeyd edək ki, 57 kq çəki dərəcəsində mübarizə aparan Ümid Rüstəmov Jan Kaysedonun (Ekvador) ardınca italiyalı Françesko İozia ilə döyüşüb. Yarımfinal görüşü həmyerlimizin qələbəsi ilə başa çatıb. O, rəqibini 5:0 (30:27, 29:28, 29:28, 30:27, 30:27) hesabı ilə məğlub edib. Rüstəmov çempionluq uğrunda Eduard Savvinlə (Rusiya) qarşılaşacaq.

Nəbi İsgəndərov (67 kq) isə ardıcıl olaraq, üçüncü görüşündə də inamlı qələbə qazanıb. Avropa çempionatının mükafatçısı Atomani Barouf (Komor adaları) və Selbi Dlamini Tabisonun (Esvatini) ardınca Abdulhakim Akramı (Seyşel adaları) da rinqdən məyus yola salıb. Gəncə boks məktəbinin yetirməsi bu dəfə ikinci raundda tam üstünlüklə qalib gəlib. İsgəndərov finalda Tarxan İdiqovla (Rusiya) üz-üzə gələcək.

Alfonso Dominqes (86 kq) də qızıl medal uğrunda döyüşə vəsiqə qazanıb. Dünya çempionumuz yarımfinalda Endi Lesmesdən (İspaniya) üstün olub. O, rəqibini 4:1 (29:28, 29:28, 27:30, 29:27, 29:28) hesabı ilə məğlub edib. Dominqes qızıl medal uğrunda Şarabutdin Atayevlə (Rusiya) döyüşəcək.

Yığmamızın digər boksçuları Məsud Yusifzadə (51 kq) və Sərxan Əliyev (71 kq) isə cıxışını üçüncü pillədə başa vurmaqla turnirin bürünc medalı ilə kifayətlənib. Yusifzadə Martin Molina (İspaniya) və Əliyevsə Stiv Kulenqulukla (Konqo Demokratik Respublikası) qarşılaşmadan məğlub ayrılıb. 

Qeyd edək ki, 34 ölkədən 201 boksçunun (119 kişi, 82 qadın) qatıldığı yarışda final döyüşləri fevralın 10-da olacaq.

İNTİQAM Məmmədov