Yeni Azərbaycan Partiyası Kəlbəcər rayon təşkilatının sədri Həbib Misirov partiyanın fəalları ilə birlikdə Türkiyənin Gəncədəki Baş konsuluğuna gələrək konsul Recep Öztopa Türkiyənin Kahramanmaraş, Qaziantep və digər cənub bölgələrində baş vermiş güclü zəlzələ nəticəsində həlak olanların ailələrinə və yaxınlarına, qardaş Türkiyə xalqına dərin hüznlə başsağlığı verib, yaralananlara və xəsarət alanlara şəfa diləyib. Həbib Misirov bildirib ki, Türkiyədə zəlzələnin baş verməsi ilə əlaqədar dünyanın müxtəlif ölkələrindən humanitar yardım gəlməyə başlayıb.

Yardım üçün müraciət edən ilk ölkə Azərbaycan olub. Prezident İlham Əliyev zəlzələnin baş verdiyi gün Türkiyə Prezidenti Rəcəb Tayyib Ərdoğana zəng edib. Dövlətimizin başçısı Türkiyədə baş vermiş zəlzələ nəticəsində çoxsaylı insan tələfatı və dağıntılarla bağlı xəbərin Azərbaycanı çox sarsıtdığını və kədərləndirdiyini deyib. Dövlətimizin başçısı Azərbaycanın hər zaman olduğu kimi, zəlzələdən sonra ilk dəqiqələrdən, ilk saatlardan qardaş Türkiyənin yanında olduğunu vurğulayıb: Dövlət başçısının dediyi kimi, Azərbaycan sona qədər öz dəstəyini göstərəcək. Ölkəmizdən davamlı olaraq zəlzələ zonasına humanitar yardımlar, həkimlər, xilasedicilər, könüllülər göndərilir və göndəriləcək. Türkiyədə çoxsaylı insan tələfatına səbəb olmuş zəlzələ qurbanlarına dəstək məqsədilə Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın göstərişinə əsasən, Heydər Əliyev Fondu tərəfindən qardaş ölkəyə humanitar yardım göndərilib.

Bütün Azərbaycan xalqı kimi, Yeni Azərbaycan Partiyasının üzvləri də bu çətin günlərdə Türkiyə xalqının yanında olduqlarını nümayiş etdirir, öz imkanları daxilində köməyini əsirgəmirlər. Bununla yanaşı, Yeni Azərbaycan Partiyasının Sədri cənab İlham Əliyevin tapşırığı əsasında YAP Mərkəzi Aparatı tərəfindən təbii fəlakətdən zərər çəkmiş şəxslərə humanitar yardım göndərilibdir. Həbib Misirov qeyd etdi ki, həmçinin Azərbaycanın bir çox bölgələri Türkiyədə baş vermiş güclü zəlzələdən zərərçəkənlərə yardım aksiyasına fəal qoşulublar. YAP Kəlbəcər rayon təşkilatının cox saylı üzvüləridə axın-axın təşkil olunan yardım toplama məntəqələrinə gəlir, gətirdikləri əşyaları aidiyyəti üzrə təhvil verirlər. Bundan başqa, qardaş ölkəyə maddi vəsait və ianələr şəklində də dəstək göstərirlər. Baş Konsul Recep Öztop Türkiyəyə ilk dəstək verən ölkənin Azərbaycan olduğunu vurğulayaraq bildirdi ki, Azərbaycan xalqı da ürəkdən öz dəstəyini ifadə edir, Türkiyənin acısını bölüşür. Bununla Türkiyə-Azərbaycan qardaşlığının daha bir nümunəsi göstərilir. Buna görə Azərbaycan dövlətinə, xalqına təşəkkür edirəm.