Zəlim Kotsayev turnirin qalibi olub

Fevralın 16-da İzrailin payraxtı Təl-Əvivdə kişi və qadın cüdoçular arasında startı verilən və Azərbaycanın da 9 tatami ustası ilə qatıldığı "Böyük Dəbilqə" turniri bu gün başa çatıb. Turnirin son günü Azərbaycan cüdoçuları üçün daha uğurlu olub. Belə ki, son gündə tatamiyə çıxan 4 təmsilçimizdən 3-ü uğurla çıxış edərək, mükafatçılar sırasında yer alıb. Ən yaxşı nəticəni isə 100 kq-da mübarizə aparan Zəlim Kotsayev göstərib. Belə ki, keçirdiyi 4 görüşün hamısını qələbə ilə bitirən Kotsayev turnirin qalibi adını qazanaraq. qızıl medala layiq görülüb. Xatırladaq ki, finala qədər müvafiq ardıcıllıqla Rafael Buzakarinini (Braziliya), Esley Qonsalesi (Rumıniya) və italiyalı Cennaro Prellini məğlub edən cüdoçumuz həlledici finalda isə hollandiyalı Maykl Korrelanı üstələyib. 

Kotsayevlə yanaşı, +100 kq-da çıxış edən Uşanqi Kokuari də finala yüksəlib. Təəssüflər olsun ki, finala qədər Rumıniya, Fransa və Brazilya təmsilçisin məğlub edən Kokuari finalda monqol cüdoçu Tsetsetsenqelyu ilə bacarmayıb. Nəticədə çıxışını ikinci pillədə başa vurmaqla gümüş medalla kifayətlənib. Günün daha bir medalçısı isə Məmmədəli Mehdiyev (90 kq) olub. O, çıxışını 3-cü pillədə bitirməklə bürünc medala sahib çıxıb. Yeri gəlmişkən, turnirin birinci günündə tatmiyə çıxan cüdoçularımızdan Orxan Səfərov (66 kq) yalnız finalda büdrəyərək, gümüş medal qazanmışdı. 

Beləliklə, Azərbaycan 4 (1-2-1) medalla 52 ölkə arasında Fransa (3-1-1), Kanada (2-1-2), İzrail (2-1-2) və Gürcüstan (2-0-1) komandasından sonra 5-ci yeri tuitub. Azərbaycan bu turnirdə İtaliya, Monqolıstan, İngiltərə, İsveçrə, İspaniya, Almaniya, Türkiyə və sair komandalarıgeridə qoyub. 

İNTİQAM Məmmədov