Estoniyanın paytaxtı Tallin şəhərində yeniyetmə və gənclər arasında qılıncoynatmanın hər üç növü (sablya, şpaqa və rapira) üzrə keçirilən və Azərbaycan idmançılarının da qatıldığı Avropa çempionatında gənclərin şəxsi yarışları başa çatıb. Azərbaycan Qılıncoynatma Federasiyasından verilən məlumata görə, ölkəmiz həm gənc sablyaçı, həm də şpaqaçı qızların yarışında təmsil olunub. Gənc sablyaçı qızların şəxsi yarışında ölkəmizi təmsil edən Zərifə Hüseynova qrup mərhələsini 5 qələbə ilə başa vurandan sonra bu nəticə ilə birbaşa 32-liyə yüksəlib. Bu mərhələdə Rumıniya təmsilçisi Dumitru Catincaya 15:13 hesabı ilə qalib gələn gənc müşketyorumuz ən güclü 8-liyə yüksəlmək uğrunda keçirilən görüşdə məğlubiyyətlə üzləşib. O, turnirin finalına kimi irəliliyən Türkiyə idmançısı Nisanur Erbilə ilə qarşılaşmada 10:15 hesabı ilə uduzub.

Gənc şpaqaçı qızların şəxsi yarışında isə ölkəmizi Xədicə Həsənli (4 qələbə), Azərin İdriszadə (2 qələbə), Nazilə Rəhimova (2 qələbə) və Aynur Quliyeva dördlüyü təmsil edib. Qeyd edək ki, ilk üçlüyümüz qrup mərhələsini uğurla adlyaraq pley-offa yüksəlib. Xədicə Həsənli və Nazilə Rəhimova 64-lüyə yüksəlməyi bacarsa da bu mərhələdə məğlub olub. Azərin İdriszadə isə 64-lüyə yüksəlmək uğrunda keçirilən pley-off görüşündə uduzub. Aynur Quliyeva isə pley-offa adlaya bilməyib.

İNTİQAM Məmədov