Xeyransa İSMAYIL:

Qaranlıqda doğan günəş- "Zərifə Əliyeva-100"

Bu gün görkəmli alim, həkim-oftalmoloq, tibb elmləri doktoru, professor Zərifə xanım Əliyevanın doğum günüdür. Zərifə Əliyeva ölkəmizdə tibb sahəsinin inkişafına əhəmiyyətli töhfələr vermişdir. Zərifə xanım Azərbaycanda yüksəkixtisaslı kadrların hazırlanması işinə əmək sərf etmiş, ağır əməliyyatlar aparmış, görmə qabiliyyətini itirmiş insanlara yeni günəş bəxş etmişdi. Öz xalqına, millətinə, doğma Vətəninə məhəbbət onun həyatında öz təcəssümünü tapmışdı. Zərifə Əliyevaya bütün bu işlərdə dəstək hər zaman yoldaşı Heydər Əliyev tərəfindən gəlirdi. Heydər Əliyev onu tək qoymamış, bir növ dayağına çevrilmişdi. Bakıda müasir Oftalmologiya Mərkəzinin yaradılması məhz onun adı ilə bağlıdır. Elmi-tədqiqatlara olan marağı Zərifə xanımı Oftalmologiya Elmi Tədqiqat İnstitutuna gətirib çıxarmışdı. Onun alim, professor kimi qazandığı uğurlar Azərbaycan tibb elminin tarixində unudulmaz izlər qoymuşdu. Göstərdiyi xidmətlərə görə Zərifə Əliyeva 1983-cü ildə Azərbaycan Respublikası Elmlər Akademiyasının akademiki seçilmişdir. O, həmçinin də Azərbaycanın əməkdar elm xadimi fəxri adını da almışdır. Bu gün Zərifə Əliyevanın adına  Akademik Zərifə Əliyeva adına Elmi Tədqiqat Göz Xəstəlikləri İnstitutu, Milli Oftalmologiya Mərkəzi, Naxçıvan şəhər poliklinikası, küçələr, xəstəxanalar vardır. Zərifə xanım Əliyevanın bu gün adı qürürla səslənir, əziz xatirəsi ehtiramla yad edilir.

X.İsmayıl