Cokoviçin bu yarımfinal matçını Bill Qeyts də izləyib

Melburunda (Avstraliya) tennis üzrə keçirilən  və mükafat fondu 76,500.000 Avstraliya dolları təşkil edən "Australian Open" artıq finişə çatıb. Mövsümün ilk "Böyük Dəbilqə" yarışında bu gün 1\2 final oyunları keçirilib və bununla da finalçılar müəyyənləşib. Maraqlıdır ki, finalçılardan biri serbiyalı raketka ustası Novak Cokoviç olub. Hazırda dünyanın 5 nömrəli raketka ustası olan Cokoviç finala çıxışda amerikalı Tommi Polu məğlub edib - 7:5, 6:1, 6:2. Onun finaldakı rəqibi isə digər yarımfinalda rusiyalı Karen Xaçanovu 7:6, 6:4, 6:7, 6:3 hesabla üstələyən yunanıstanlı Stefanos Tsitsipas olacaq. Qeyd edək ki, bu final Cokoviçin bəlli turnirdə sayca 10-cu finalıdır. O, bundan əvvəlki 9 finalın hamısını qələbə ilə bitirib və turnirin 9 qat çempionu olub. Maraqlıdır ki, 21 dəfə "Böyük Dəbilqə"ni udan serbiyalı raketka ustası karyerasında 33 dəfə finala yüksəlməklə öz rekordunu təzələyib. Cokoviçin Tsitsipasla arasında olan oyunlara gəlincə, ümumi hesab 10:2 olmaqla serbiyalının xeyrinədir. Rəqiblər son dəfə ötən il Fransada keçirilən "Rolan Qarros"da üzləşiblər və görüş  serbiyalının qələbəsiylə bitib. Cokoviçin ötən ilin sonlarından bəri kortu dalbadal 16-cı dəfə qələbə ilə tərk etdiyi bu yarımfinal matçını "Microsoft"un yaradıcısı Bill Qeyts də izləyib.

İNTİQAM Məmmədov