Masallıda şəhid ailəsi üçün ev tikilib 

Heydər Əliyev Fondu və Masallı Rayon İcra Hakimiyyətinin təşəbbüsü, xeyriyyəçilər və iş adamlarının dəstəyilə Masallı  rayonunda şəhid ailələri üçün evlər tikilir. Belə evlərdən biri də Rüdəkənar kəndində, I Qarabağ müharibəsi şəhidi Arzuman Mirzəli oğlu Qurbanovun ailəsi üçün tikilib.

Avqustun 23-də fərdi yaşayış evinin açılışı olub.

Mərasimdə Masallı Rayon İcra Hakimiyyətinin başçısı Araz Əhmədov və digər rayon rəsmiləri, Milli Məclisin deputatı Anar İsgəndərov, şəhid ailələri, qazilər, kənd sakinləri iştirak ediblər.

RİH başçısı Araz Əhmədov, iki şəhid anası Ziba Əsgərova, professor, Milli Məclisin deputatı Anar İsgəndərov, şəhid atası Tofiq Şahbazov və başqaları Müzəffər Ali Baş Komandan İlham Əliyevin rəhbərliyilə qazanılan tarixi qələbədən, ordu-xalq birliyindən, Arzuman kimi qəhrəman oğullarımızın döyüş şücaətindən danışıblar.

Şəhidin ailə üzvləri onlara göstərilən diqqət və qayğıya görə ölkə Prezidenti cənab İlham Əliyevə, Birinci vitse-prezident Mehriban Əliyevaya, rayon rəhbərinə minnətdarlıqlarını bildiriblər.

Şəhidin məzarı ziyarət olunub, üzərinə gül dəstələri düzülüb, ruhuna dualar oxunub.

Məlumat üçün bildirək ki, Qurbanov Arzuman Mirzəli oğlu 9 mart 1974-cü ildə Rüdəkənar kəndində anadan olub. 1991-ci ildə kənd orta məktəbini bitirib. Lənkəran şəhər 169 nömrəli orta texniki-peşə məktəbində təhsil alıb.

1992-ci ilin iyununda hərbi xidmətə çağırılıb. Ağdam rayonunun Mərzili, Sırxavənd, Abdal-Gülablı, Fərrux, Qazançı, Güneytəpə kəndlərinin, Xramord yüksəkliyinin düşməndən azad olunmasında iştirak edib. Gülablıda gedən qeyri- bərabər döyüşdə ağır yaralanıb, Bakı şəhərindəki 3 nömrəli klinik xəstəxanada bir müddət müalicə olunduqdan sonra cəbhəyə qayıdıb. Son döyüşü fevralın 9-da Ergi kəndi yaxınlığındakı olub. 

Rüdəkənar kəndində dəfn edilib. Kənd orta məktəbinə onun adı verilib.

Akif AĞAYEV