“Təhsil uğurları parlaq gələcəyin təminatıdır” – Masallıda tədbir

Gənclərin İnkişaf və Karyera Mərkəzinin (GİKM) Lənkəran-Astara Regional nümayəndəliyinin Masallı bölməsinin və Masallı Heydər Əliyev Mərkəzinin birgə təşkilatçılığı ilə 15 sentyabr - Bilik Gününə  həsr olunmuş “Təhsil uğurları parlaq gələcəyin təminatıdır” mövzusunda tədbir keçirilib.

Masallı şəhər Heydər Əliyev Mərkəzində təşkil olunan tədbir öncəsi Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib. 

GİKM-in Lənkəran-Astara Regional nümayəndəliyinin Masallı bölməsinin əməkdaşı Orxan Əliyev, Masallı Heydər Əliyev Mərkəzinin əməkdaşı Şəfa Xəlilova, Masallı Dövlət Regional Kollecinin əməkdaşı Elvira Sultanzadə, şəhər 2 saylı tam orta məktəbin müəllimi Elanura Babayeva Azərbaycan  Respublikasının Prezidenti İlham Əliyevin 2004-cu il 21 avqust tarixli Fərmanı ilə ölkəmizin bütün təhsil müəssisələrində dərslərin sentyabrın 15-də başlanmasını və həmin günün "Bilik Günü" kimi qeyd edilməsinin qərara alındığını, Azərbaycan təhsilinin inkişafında Ulu öndər Heydər Əliyevin tarixi xidmətlərindən danışaraq Ümummilli Liderin Azərbaycan xalqının gələcəyinə istiqamətlənmiş strategiyasında təhsil sahəsinin inkişaf etdirilməsinin əsas məsələlərdən biri olduğunu vurğulayıblar. Natiqlər Prezident İlham Əliyevin təhsil sahəsinə verdiyi önəmdən, azərbaycanlı gənclərin dünyanın nüfuzlu təhsil müəssisələrində dövlət proqramları ilə təhsil almalarını, dövlətimiz tərəfindən elmə və təhsilə daim yüksək diqqət və qayğı göstərildiyini xüsusi qeyd ediblər.

Tədbirin sonunda “Heydər Əliyev və təhsil” adlı film nümayiş olunub. 

Akif AĞAYEV