Masallıda şəhid Sənan Mirzəyevlə vida mərasimi 

Azərbaycan Respublikasının Silahlı Qüvvələri tərəfindən Qarabağ bölgəsində həyata keçirilən lokal xarakterli antiterror əməliyyatları nəticəsində şəhid olan 2004-cü il təvəllüdlü əsgər, 2004-cü il təvəllüdlü Masallı şəhər sakini Mirzəyev Sənan Vüqar oğlu ilə vida mərasimi keçirildi.

Sentyabrın 20-də Vətən torpaqlarının ərazi bütövlüyü uğrunda qəhrəmancasına şəhid olan əsgərimizin nəşi doğulduğu ünvanda, Masallı şəhərində torpağa tapşırıldı.

Dəfn mərasimində Masallı Rayon İcra Hakimiyyətinin başçısı Araz Əhmədov və aparatın məsul işçiləri, şəhidin doğmaları, idarə-müəssisə və təşkilatların rəhbərləri, hüquq-mühafizə orqanlarının əməkdaşları, din xadimləri, rayon ictimaiyyəti və KİV nümayəndələri iştirak edirdi.

Vida mərasimində vətənpərvərlik, qəhrəmanlıq şüarları səslənirdi. 

Masallı Rayon İcra Hakimiyyətinin başçısı Araz Əhmədov şəhidin ailəsinə dərin hüznlə başsağlığı verərək bildirdi ki, torpaqlarımızın müdafiəsi uğrunda canlarını fəda edən şəhidlərimizin qisası güclü ordumuz tərəfindən düşməndən alınır: ”Qüdrətli Azərbaycan Ordusu düşmənə hər an tutarlı zərbə vurmağa hazırdır, hərbçilərimiz, xalqımız Respublika Prezidenti, Ali Baş Komandan cənab İlham Əliyevin ətrafında daha da sıx birləşəcək. Sinəsini Ana Vətənimizə sipər edib məkrli düşmənə layiqli cavab verən şəhid Sənan Mirzəyev kimi Azərbaycan oğullarının xatirəsi qədirbilən xalqımızın yaddaşında əbədi yaşayacaq!..”

Rayon rəhbəri şəhid əsgərimizin tabutuna bükülmüş müqəddəs Azərbaycan Bayrağını babası Zakir Mirzəyevə təqdim etdi.

Akif AĞAYEV