Masallıda 27 Sentyabr - Anım Günü 

Respublikamızın hər yerində olduğu kimi Masallıda da 27 Sentyabr - Anım Günü ilə bağlı ümumrayon tədbiri keçirilib.

Əvvəlcə Qəhrəmanlar parkındakı “Şəhidlər” abidə kompleksini ziyarət edən Masallı Rayon İcra Hakimiyyətinin başçısı Araz Əhmədov və digər rayon rəsmiləri, şəhid ailələri və qazilər, ziyalılar, din xadimləri, eləcə də rayon ictimaiyyətinin nümayəndələri Azərbaycanın azadlığı və suverenliyi uğrunda sücaət göstərmiş mərd oğullarımızın xatirələrini ehtiramla yad edib, abidə önünə tər gül dəstələri düzərək, şəhid Vətən övladlarının ruhuna dualar oxuyublar.

Anım mərasimi abidə-kompleksinin önündə davam edib. Çıxışlar öncəsi Vətən uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad olunub.

Rayon icra hakimiyyətinin başçısı Araz Əhmədov qeyd edib ki, haqq və şərəf savaşında – 44 günlük Vətən müharibəsində Müzəffər Ali Baş Komandamızın rəhbərliyilə mətin xalqımız və rəşadətli Ordumuz böyük Zəfərə imza atdı: “Uzun illərin yurd həsrətinə son qoyuldu. İndi Qarabağ təzədən qurulur, keçmiş məcburi köçkünlərimiz doğma yuvalarına qayıdırlar. Bu gün Azərbaycan bayrağı düşmən tapdağından azad edilən torpaqlarımızda yenidən dalğalanır…”

Şəhid valideynləri Leyla Əliyeva, Vahid İsgəndərov, Aslan Məhərrəmov, Qafqaz Müsəlmanları İdarəsinin Masallı rayonu üzrə qazısı Rəşid Talıbov və başqaları çıxışlarında xalqımızın tarixi uğurundan, bizlərə fəxarət gətirən qəhrəman şəhid və qazilərimizin şücaətindən danışıblar… 

Tədbirdən sonra Masallı şəhər «Axund Məmmədqulu» məscidində Anım Günü ilə bağlı ehsan süfrəsi açılıb.

Akif AĞAYEV