İstiqlal Muzeyində “Müqəddəs Andım” adlı növbəti tədbir

03 oktyabr  Azərbaycan İstiqlal Muzeyinini təşkilatçılığı ilə  44 günlük Vətən Müharibəsi zamanı Azərbaycanın ərazi bütövlüyü uğrunda döyüşərək canlarından keçmiş şəhidlərin əziz xatirəsinə həsr olunmuş “Qəhrəmanlar Can Verir Yurdu Yaşatmaq üçün” adlı layihə çərçivəsində “Müqəddəs Andım” növbəti tədbir – sərgi keçirilib.
 Azərbaycan Respublikası Prezidenti Silahlı Qüvvələrin Ali Baş komandanı cənab İlham Əliyevin 03 dekabr 2020-ci ildə Zəfər muzeyinin və Memorial kompleksin inşası ilə əlaqədar imzaladığı sərəncama əsasən, 2021-ci ilin yanvar ayından Mədəniyyət Nazirliyinin əmrinə əsasən Azərbaycan İstiqlal Muzeyi tərəfindən Zəfər muzeyinin fondlarının kompleksləşdirilməsi məqsədi ilə şəhid ailələri ilə görüş keçirilir və şəhidlərin şəxsi əşyaları Zəfər muzeyi üçün toplanır. 
Azərbaycan ərazi bütövlüyü və suverenliyi uğrunda şəhidlik zirvəsinə ucalanların xatirəsini yaşatmaq, onların qəhrəmanlığını gələcək nəsillərə nümunə göstərmək hər birimizin borcudur. Bu məqsədlə  Vətən torpaqlarının işğaldan azad olunmasında xidmətlər göstərmiş qəhrəmanlarımıza və onların ailə üzvlərinə diqqət və qayğı daima Azərbaycan Dövlətinin və Prezident cənab İlham Əliyevin nəzərində olmuşdur. 
Tədbirdə Azərbaycan İstiqlal Muzeyinin direktoru Sədi Mirseyibli, şəhid əsgər Vüsal Məmmədovun anası Mahirə Məmmədova, şəhid gizir Məhəmmədəli Ələkbərovun həyat yoldaşı Kövsər Ələkbərova , şəhid baş leytenant Famil Əhmədzadənin qardaşı Fərid Əhmədli, şəhid mayor  Asiman  Əliyevin qohumu Eltun Həsənli,  şəhid əsgər Abbas Əliyevin  anası Təranə Əliyeva , şəhid əsgər  Rövşən Məmmədovun anası Mənzərə Məmmədova və şəhid kiçik çavuş Elşən Müslümovun anası Şövqiyyə Müslümova çıxış ediblər.
Daha sonra sərgidə muzey fondlarımızda qorunub saxlanılan Vətən müharibəsi şəhidlərinin şəxsi əşyaları, fotoşəkillər, sənədlər və  müxtəlif hərbi qeyimlər nümayiş olundu. 
Tədbirdə şəhid ailələri,  Azərbaycan Dövlət Dəniz Akademiyasının kursantları və “Bir” Könüllü təşkilatının könüllüləri iştirak ediblər. 
Azərbaycan İstiqlal Muzeyində təşkil olunan sərgi oktyabr ayının 10-na qədər davam edəcək.