Agentliyin dəstəyi ilə nəşr olunan  “And yerimiz –şəhidlər” adlı kitabın Quba rayonunda təqdimatı keçirildi +VİDEO

“Beynəlxalq Əlillər Cəmiyyəti” İctimai Birliyi (BƏC İB) Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirdiyi layihə zamanı vaxtı ilə Quba, Qusar və Xaçmaz rayonlarında yaşamış, Vətənimizin azadlığı uğrunda ikinci Qarabağ müharibəsi zamanı şəhid olmuş igidlərimiz barədə yerli icra hakimiyyətlərindən alınmış statistik məlumatlar əsasında “And yerimiz-şəhidlər” (II hissə) adlı kitab nəşr etdirib.   

Oktyabr ayının 3-də Quba Bələdiyyəsinin Akt zalında “And yerimiz-şəhidlər” adlı kitabın təqdimatı keçirildi.  Tədbir Ulu Öndər Heydər Əliyevin və bütün şəhidlərimizin əziz ruhunun 1 dəqiqəlik sükutla yad edilməsi ilə başladı. “Beynəlxalq Əlillər Cəmiyyəti” İctimai Birliyinin sədri və layihə rəhbəri  Tahir Xudiyev layihə barədə məlumat verərək kitabı tədbir iştirakçılarına təqdim etdi və bildirdi ki, layihənin məqsədi kitab nəşr etdirməklə yanaşı, yerlərdə şəhid ailələri və qazilərə, əlilliyi olan və digər imtiyazlı şəxslərə dövlətin sosial-siyasi qayğısının lazımınca icra olunmasına ictimai nəzarət etmək və yeri gəldikdə problemlərinin həllinə ictimai dəstək göstərməkdən ibarət olmasından danışdı.  

Tədbirdə çıxış edən Quba Rayonu İcra Başçının müavini, İctimai-siyasi və humanitar məsələlər şöbəsinin müdiri  Səidə Abasova, BƏC İB Şəhid anaları şöbəsinin rəhbəri, şəhid polkovnik-leytenant Rəşad Quliyevin anası Mətanət Quliyeva, BƏC İB İdarə Heyəti üzvü, AzTV-nin redaktoru, əməkdar jurnalist Zərnişan Turan, BƏC İB üzvü, 2-ci qrup əlil Tahir Quliyev, Quba Bələdiyyəsinin sədri Humayə Məmmədova  çıxış edərək Ali Baş Komandan cənab İlham Əliyevin rəhbərliyi ilə torpaqlarımızn düşmənlərdən azad edilməsi və ərazi bütövlüyümüzün bərpası yolunda Ordumuzun sücaətindən danımış, şəhidlərimizn xatirəsini ehtiramla anmışlar. Şəhid Vətən Müharibəsi Qəhrəmanı Şahin Allahyarovun anası Nərgiz Allahyarova, şəhid Səttər Piriyevin anası Ofeliya Piriyeva, şəhid Tamerlan Əliyevin anası Zümrüd Xaliqova çıxış edərək təşəkkürlərini bildirdilər, şəhid balalarımızın tanıdılması, adlarının, xatirələrinin əbədiləşdirilməsi üçün nəşr olunan kitabların, çəkilən filmlərin onlara xeyli təsəlli olmasından bəhs etdilər. 

Tədbirdə şəhid ailələri və qazilər, Quba Rayonu İcra Hakimiyyətinin Vətən Müharibəsi İştirakçıları və Şəhid Ailələri ilə işin Təşkili şöbəsinin müdiri Asəf Şirinov, Quba RİH-nın  məsləhətçisi Əhməd Nurullayev,  KİV və ictimaiyyət nümayəndələri iştirak edirdilər.  

 “Beynəlxalq Əlillər Cəmiyyəti” İB İdarə Heyəti üzvü Məlahət Abdullayeva  Vətənimizin azadlığı uğrunda canlarından keçən şəhidlərimizin tanıdılması, xatirələrinin əbədiləşdirilməsinin hər birimizin borcu olduğunu və onların tanıdılmasına yaradılan şəraitə görə dövlətimizə, Agentliyə, Quba Rayonu İcra Hakimiyyətinin bütün əməkdaşlarına təşəkkürünü bildirdi.

Sonda xatirə şəkli çəkildi.

Tədbirdən sonra “Beynəlxalq Əlillər Cəmiyyəti” İB-in əməkdaşları və Quba Rayon İcra Hakimiyyətinin nümayəndələri Azərbaycan Respublikasının suverenliyinin tam bərpa olunması ilə nəticələnən Azərbaycan Silahlı Qüvvələri tərəfindən 19-20 sentyabr 2023-cü il tarixində həyata keçirilmiş uğurlu lokal antiterror tədbirləri nəticəsində şəhid olan Quba rayon sakinlərinin ailələrində oldular, onlara müqəddəs Quran kitabı və xurma payı hədiyyə etdilər.