Daha 3 boksçumuz Avropa kubokunda mərhələ adlayıb

Monteneqronun Budva şəhərində boks üzrə keçirilən və azərbaycanlı rinq ustalarının da iştirak etdiyi Avropa kuboku davam edir. Azərbaycan da daxil olmaqla qitənən 29 ölkəsini təmsil edən 156 boksçunun qatıldığı turnirin ikinci günü yığmamız üçün daha uğurlu olub. Belə ki, ikinci gün rinqə çıxan 3 boksçumuzun hamısı rəqibini üstələyərək növbəti mərhələyə keçib. 

Azərbaycan Boks Federasiyasından verilən məlumata görə, bu triomuzdan Tayfur Əliyev (60 kq) mübarizəyə qatıldığı 1/8 finalda Cuzeppe Kanoniko (İtaliya) ilə qarşılaşıb və onun üzərində inamlı qələbə qazanıb – 5:0 (30:27, 30:27, 30:27, 30:27, 30:27). O, növbəti döyüşünü oktyabrın 12-də rusiyalı Arşak Tovmasyana qarşı keçirəcək.

Trioda yer lan Sərxan Əliyevsə (71 kq) start döyüşündə Toni Cası (İBAN) 5:0 (29:27, 29:27, 29:27, 29:27, 29:27) hesabı ilə məğlub edib. Sərxan oktyabrın 12-də  1/4 finalda israilli Miroslav Kapulerlə üz-üzə gələcək. 

Günün daha bir qəhrəmanı isə 63,5 kq-da rinqə çıxan Malik Həsənov (63,5 kq) olub. O, 1/8 final mərhələsində Bartumey Roskovici (Polşa) mübarizədən kənarlaşdırıb - 5:0 (30:27, 30:27, 30:27, 30:27, 30:27). Həsənov ikinci döyüşündə fransalı Lounes Hamraouini sınağa çəkəcək. Qarşılaşma oktyabrın 11-də baş tutacaq.

Xatırladaq ki, turnirin ilk günündə iki təmsilçimiz mübarizəyə qatılmışdı ki, onlardan da biri - Şamil Əsgərov (57 kq) mərhələ adlaya bilib. Trkiyəli Batuhan Ciftçini 4:1 hesablı qələbə ilə mübarizədən kənarlaşdıran Şamil oktyabrın 11-də 1/4 final mərhələsində ispaniyalı Qabriel Eskobarla döyüşəcək.

Qeyd edək ki, Avropa kubokunun sabaha təsadüf edən 3-cü günündə millimizin daha 2 boksçusu mübarizəyə qoşulacaq. Bu cütlükdən Nicat Hüseynov (54 kq) Cianis Salotski (Belarus) ilə, Nəbi İsgəndərov (67 kq) Adrian Krusla (İspaniya) gücünü yoxlayacaq.

İNTİQAM Məmmədov