“Qazilərlə görüş” adlı bədii tədbir keçirilib

18 oktyabr 2023 – cü il tarixində   Azərbaycan İstiqlal Muzeyinin  “QƏHRƏMANLAR CAN VERİR, YURDU YAŞATMAQ ÜÇÜN” adlı layihəsi çərçivəsində “Qazilərlə görüş” adlı bədii tədbir keçirilib. 
18 oktyabr – Müstəqilliyin Bərpası gününə həsr olunmuş tədbirdə bu günün tarixi əhəmiyyətindən danışılıb. Bildirilib ki, məhz həmin gün Azərbaycan xalqı XX əsrdə ikinci dəfə öz dövlətçiliyinin varlığını bəşəriyyətə bəyan etdi. 
Azərbaycan İstiqlal Muzeyinin ekspozisiyası ilə tanış olduqdan sonra, qazilərin çıxışlarında, sarsılmaz birliyə malik olan xalqımızın milli müstəqilliyinin bərpa olunmasından 32 il keçməsi vurğulanıb. Ali Baş Komandan İlham Əliyevin rəhbərliyi ilə Silahlı Qüvvələrimizin 44 günlük Vətən müharibəsində əldə etdiyi Zəfərdən, şanlı tarix yazan Vətən oğullarımızın qəhrəmanlığından, misilsiz rəşadətindən, hərbçilərimizin əzmkarlığından, xalqımızın mübarizliyindən bəhs edilib. Bu birliyin gücünə  44 gün davam edən haqq savaşındakı həmrəyliyimiz və sentyabrın 19-u başlayan , bir gün ərzində başa çatan anti-terror əməliyyatı nəticəsində torpaqlarımıza qovuşmağımızla bir daha şahid olduq. Bu gün artıq Azərbaycanın əbədi müstəqilliyinin gözəl sədası Qarabağdan gəlir.
Tədbirdə “Bülbül” adına  orta ixtisas musiqi məktəbinin istedadlı , fəal uşaqları vətənpərvərlik mövzusunda musiqi nömrələri  və  Xalq artisti  Munis Şərifovun rəhbərlik etdiyi  Azərbaycan Musiqi Mədəniyyəti Dövlət Muzeyinin Qədim Musiqi Alətləri Ansamblının müşayəti ilə konsert proqramı keçirilmişdir. 
Tədbirdə Azərbaycan Respublikası Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Tibbi-Sosial Ekspertiza və Reabilitasiya Agentliyinin Bakı Reabilitasiya Mərkəzində müalicə alan qaziləri , Xətai r-nu 7 №-li tam orta məktəblərin şagirdləri və İRƏLİ İçtimai Birliyinin könüllüləri iştirak ediblər.