Tahir Süleymanov: 

Tovuz futbolunun işığı heç vaxt sönməsin, klublarımız yenidən dirçəlsin, parlasın!

Tovuzda futbol hər zaman sevilib. Bu bölgə futboluunun özünəməxsus koloriti var. Azarkeşlər doğma komandalarına öz sadiqliyi, dəstəyi, tələbkarlığı ilə seçilir. Tovuz mühiti, mental mədəniyyəti, qonaqpərvərliyi futbolda müsbət aura yaradır...

Tovuz futbolunun tarixi qədimdir, ötən əsrin əvvələrinə gedib çıxır. Müstəqillik illərində ilk peşəkar futbol klub formalaşdıran tovuzlular oldu. Vidadi Əhmədovun şəxsi maliyyəsi və dostlarının mənəvi dəstəyi ilə "Turan" adı Azərbaycan futbolunda özünəməxsus yer tutmağa başladı, stadion təmir edildi, təbii ot örtüyü yeniləndi, baza inşasının təməli qoyuldu və barışmaz yerli azarkeşləri liderliyə, çempion komanda ruhuna alışdırdı.

"Turan"ın heyətində Nizami Sadıqov, Sakit Alıyev, Elxan Abdıyev və digər yerli futbolçularla birgə Vidadi Rzayev, Musa, Qurban Qurbanov qardaşları, İlham Məmmədov, Məqsəd Yaqubəliyev, Rüfət Quliyev kimi futbolçularla, Ruslan Abdullayev, Kazbek Tuayev, Xanoğlan Abbasovun rəhbərliyi altında çempionatın favoritlərindən birinə çevrilmişdilər. Klub idarəçiləri Şahin Mehdiyev, Rasim Əliyev, İman Həsənov Vidadi müəllimə, kluba dayaq idilər. Təsadüfi deyil, Azərbaycanı ilk dəfə avroliqada (UEFA Kuboku) "Turan" təmsil edib, İstanbul nəhənglərindən "Fənərbaxça" ilə qarşılaşıb.

Vidadi Əhmədov dönəmindən sonra klub çox sıxıntılar çəkib, çətinliklə ayaqda durmağı bacarıb, Hüseyn Məhəmmədov, Ruslan Sadıxov, Eltay Aslanov, Cavid Hüseynov, Elvin Məmmədov, Aqil Nəbiyev kimi futbolçular yetişib. İmkansızlıqdan zaman-zaman təcrübəli, səviyyəli futbolçular klubu tərk etsə də, sadiq azarkeşlər heç vaxt komandadan üz döndərməyiblər.

"Turan"ın ikinci dirçəliş dövrü ikiminlərin əvvəllərində başladı. Mərhum klub prezidenti Tahir Yusifovun sponsorluğu ilə stadionda yenidənqurma işləri aparıldı, sonra baza təmir edildi, idarəçi, məşqçi, futbolçu heyəti formalaşdırıldı. Klubun büdcəsi heç də yüksək deyildi, iddialı rəqiblərdən çox geri qalırdı. Buna baxmayaraq çox mehriban və işini bilən kollektiv formalaşmışdı. Yaşar Sultanov, Rəşid Məhərrəmov, Namiq Məstanov, Rasim Əliyev, Süleyman Tağıyev, baş məşqçi Naci Şensoy rəhmətlik Sakit Alıyev kimi yerli köməkçilərlə, Ramiz Məmmədov, Nadir Nəbiyev, Kənan Kərimov, Azər Məmmədov, Aftandil Hacıyev, Ayxan Abbasov, Romal Hüseynov, Camal Məmmədov, Kamran Ağayev kimi yerli, Nikolov, Skaçenko kimi az sayda legioner futbolçularla "Turan" çempionata rəng qatır, liderlər sırasında yer alırdı...

90-lar bir yana, ikiminlərin ortalarında bir çox bölgələrimizdə şərait yox dərəcəsində idi, işıqlar tez-tez söndürülür, qrafiklə verilirdi. Qaz təchizatından isə danışmağa dəyməz, ümumiyyətlə, yox idi. Oyun, məşq günləri qazanxana odunla qızdırılırdı. Şəraitinin olmamasına baxmayaraq, hamımız bazada qalırdıq. Tahir Yusifov öz evini Naci bəyə versə də, o da bazada qalırdı. O qədər səmimi kollektiv formalaşmışdı ki, komandadan fərqli, daha yaxşı şəraitdə qalmağı qəbul etmirdi. Öz hesabımıza kiçik həcmli generator almışdıq, saat 18-20 radələrində işıqlar sönən kimi işə düşürdü. Heç kim də şikayət etmirdi, Bakıya qaçmırdı.

Sonrakı dövrlərdə "Turan" enişli-yoxuşlu illər keçirdi. Əsasən Musa Süleymanovun və digər tovuzlu imkanlı şəxslərin hesabına klub yaşadı,

stadiona, bazaya yenidən əl gəzdirildi, Qaraxanlıda məktəb meydanı təmir edildi, əvvəlki illərdə olduğu kimi, imkan daxilində uşaq futboluna diqqət ayrıldı, neçə-neçə yerli futbolçu üzə çıxdı. İdman idarəsi xətti ilə Sahib Ələsgərov da komandaya köməyini əsirgəmirdi.

"Turan" Tovuz müstəqil Azərbaycan çempionatlarında daimi çıxış etmiş üç klubdan biri idi. Təəssüf ki, yeni əsrin ikinci onilliyində komanda güclülər dəstəsində uzun müddət təmsil olunmadı. Klubun tam dağılmasına imkan verilmədi, rayon rəhbərliyi və federasiyanın yardımı ilə komanda birinci liqada təmsil olundu, qalib adını da qazandı, imkansızlıqdan Premyer Liqada çıxış edə bilmədi.

Artıq o illər geridə qalıb, "Turan" nəinki güclülər sırasına qayıdıb, Tovuzda qaranlıq gecələr işıqlığa qərq olub. Dövlətin maliyyə yardımı, "Hünər Qrup"un sponsorluğu ilə klub dirçəlmək yolunda addımlar atır, infrastruktur imkanları yaxşılaşdırılır, şirkət rəhbəri Ehtiram Quliyevin klub strategiyası da təqdirəlayiqdir.

"Turan"ın qısa vaxtda möhkəmlənməsinin əsas səbəblərindən biri də klubda idarəçi futbol adamlarının, Oqtay Abdullayev, Tovuz futbol məktəbinin yetirməsi Nadir Nəbiyev, böyük təcrübəyə sahib digər yerli potensialdan istifadə edilməsi, bir yumruq tək birləşməsi, vaxtilə komandada futbolçu kimi çıxış etmiş Ayxan Abbasovun baş məşqçiliyi, akademiyanın yenilənməsi, inkişaf perspektivi, azarkeşlərin klubla yaşaması gələcəyə ümidləri artırır...

Vaxtilə işığı, qazı, şəraiti olmayan Tovuzda, bu gün projektorlar altında oyunlar keçirilir. Axşam saatlarında canlı futbol tribunalarla birgə ekran qarşısında da fərqi atmosfer yaradır, daha baxımlı edir. İşıqlandırma təklif/tələbini irəli sürən fədakar PFL əməkdaşlarına, təklifi qəbul edən, dəstək verən "Hünər Qrup"a təşəkkür düşür. Tovuz futbolunun işığı heç vaxt sönməsin, layiqli yerlərə ucalmaqla, öz nurundan, işığından digər bölgələrimizə pay düşsün, klublarımız yenidən dirçəlsin, parlasın!