Rafael Hüseyn: 

GÜNÜN DAHA BIR UĞURU

Böyük Hüseyn Cavidin evindəki ən qalın kitab "Qamus-i türki" idi (Lüğətlər zatən elə qalın olar).

O kitab indi də Cavidgildədir. Həmin mənzildə - hazırda ev muzeyi olan mənzildəki otaqlardan birindəki rəfdə.

Cavid həmin kitabın cildə sondan yapışıq vərəqində - forzasında uşaqlarının doğum tarixlərini yazırmış.

Ümumən, bizim ellərdə keçmişlərdə, adətən müqəddəs kitabların sonunda, təvəllüd tarixlərini qeyd etmək ənənəsi olub.

Mən də bir köhnə dəftərimdə uzun illərdir ki, elə təvvəlüd günləri və illəri kimi əziz və vacib olan mühüm tarixləri qeyd edirəm.

Bəzən ildə 1, hərdən 2-3, elə də olur ki, lap 4-5 dəfə.

30 ilə yaxındır ki, mənimlə olan həmin qalın dəftəri açıb son vərəqlərində elmi rəhbəri ya elmi məsləhətçisi olduğum, təzə dissertasiya müdafiəsi keçən doktorantım adını, soyadını, mövzusunu və müdafiə tarixini əlavə edirəm.

Bu gün - 2023-cü il oktyabrın 20-də həmin dəftəri yenə açdım və ora 1 sətir də əlavə etdim: Aynur Həsənova. "XXəsrdə Azərbaycan Yazıçılar Birliyindəki ədəbi müzakirələrin yaradıcılıq prosesləri və ədib talelərinə təsiri". Filologiya üzrə fəlsəfə doktoru elmi dərəcəsi almaq üçün təqdim edilmiş dissertasiya.

Dissertasiya Şurasının sədri mənəmsə də, rəhbəri olduğum iddiaçı kürsüyə qalxdığından iclası mən yox, Dissertasiya Şurasının sədr müavini, professor Rəhilə Qeybullayeva idarə edirdi.

Aynur dissertasiyasını yaxşı təqdim etdi.

Rəsmi opponentlər AMEA-nın müxbir üzvü Nüşabə Araslı, professor Cəlil Nağıyev, fəlsəfə doktoru (yeri gəlmişkən elmi rəhbəri olduqlarımdan biri) Sevinc Heydərova, çıxış edənlər - dəyərli alimlərimiz Tofiq Məlikli, Yaqub Babayev, Asif Hacıyev, Abuzər Bağırov, Leyla İmaməliyeva və digərləri əsəri yüksək qiymətləndirdilər.

Müdafiə uğurla keçdi.

Bütün Dissertasiya Şurası üzvlərinin rəyi müsbət oldu.

Bu gün Azərbaycanın filoloq alimləri ailəsinə daha bir qabiliyyətli, işgüzar cavanın daxil olduğu gündür.

Təbriklər, gəlişi mübarək, sabahı uğurlu olsun!