VOLEYBOL

--------------------

Voleybolçuların Azərbaycan çempionatının püşkatma mərasimi keçirilib 

2023\2024-cü illər mövsümünə "Abşeron" - "Murov Az Terminal" matçı ilə start veriləcək

Bu gün Bakı Voleybol Mərkəzində qadın və kişi voleybolçulardan ibarət klubların mübarizə apardığı Azərbaycan çempionatının Yüksək Liqasının 2023\2024-cü illər mövsümünün püşkatma mərasimi olub. Püşkatmadan öncə Azərbaycan Voleybol Federasiyasının prezidenti Şahin Bağırov çıxış edib. Qrum rəhbəri media nümayəndələrinə üzünü tutaraq qarşıdakı yeni  mövsümdə mediadan böyük dəstək gözlədiyini vurğulayıb. 

Onun ardından çıxış edən vitse-prezident Faiq Qarayev isə çempionatda iştirak edəcək klublaın sayının artdığını dilə gətirərək ötən mövsümdən fərqli olaraq, yeni mövsümdə 4 deyil 6 klubun mübarizə aparacağını bildirib. Onun sözlərinə görə qarşıdakı mövsümdə ümumiyyətlə voleybol yarışlarının sayı da çox olacaq. Onun sözlərinə görə, kişi və qadın voleybolçularımızı qarşıda ölkə çempionatı ilə yanaşı, Avropa Qızıl Liqa, dünya və Avropa çempionatının seçmə oyunları da gözləyir. 

Bundan sonra isə həm kişilərin, həm də qadınların çempionatında iştirak edəcək klubların adları elan edilib. Məlum olub ki, qadınların çempionatında "Abşeron", "Azərreyl", "Gəncə", "Milli Aviasiya Akademiyası", "Murov AZ Terminal" və UNEC klubu mübarizə aparacaq. 

Kişilərin analoji yarışında isə, "Azərreyl", "Xarı Bülbül" (Laçın), "Xarı Bülbül" (Şuşa), MOİK, "Murov AZ Terminal" və "Nefti" çıxış edəcək. 

Komandaların adları elan edildikdən sonra püşkatma mərasimi keçirilib və bununla da həm kişilərin, həm də qadınların çempionatının start turundakı cütlər müəyyənləşib. 

Beləliklə, püşkün nəticəsindən asılı olaraq, qadınlarının yarışının ilk turunda aşağıdakı cütlər qarşılaşacaq. 

"Murov AZ Terminal" - "Abşeron"

"Aviatsiya Akademiyası" - "Gəncə"

"Azərreyl" - UNEC.

Kişilərin analoji yarışının start turunda isə, MOİK - "Xarı Bülbül" (Şuşa), "Neftçi" - "Murov", "Azərreyl" - "Xarı Bülbül" (Laçın).  

Qeyd edək ki, çempionatın ilk mərhələsi hərəsi 5 turdan ibarət olan 4 dövrədə davam edəcək. Dörd dövrədən sonra ən yaxşı 4 klub pley-offda mübarizəni davam etdirəcək. Bu mərhələdə cütlərin mübarizəsi iki qələbəyədək keçiriləcək. Final və 3-cü yer uğrunda mübarizə isə bir oyundan ibarət olacaq. 3:0 və 3:1 hesabla qalib gələn komanda 3 xal, məğlub isə 0 xal qazanmış olacaq. 3:2 hesabla bitən oyunda isə qalib 2, məğlubsa 1 xal qazanacaq.

Çempionata noyabrın 6-da Bakı Voleybol mərkəzində start götürəcək.

İNTİQAM Məmmədov