CÜDO

--------------------

Riqada daha bir Azərbaycan finalı

Yeniyetmə cüdoçulardan ibarət yığmamız AB-ni 12 medalla birinci yerdə bitirib

İki gün öncə Latviyanın paytaxtı Riqada yeniyetmə cüdoçular arasında start götürən və Azərbaycan idmançılarının da qatıldığı Avropa birinciliyinə yekun vurulub. Qeyd edək ki, turnirin ikinci günü də Azərbaycan komandası üçün maraqlı keçib. Belə ki, tatamiyə çıxan 7 cüdoçumuzdan 5-i uğurla çıxış edərək medal qazanıb (1-2-2). Günün ən diqqət çəkən məqamı isə +90 kq çəki dərəcəsində Azərbaycan finalının baş tutması olub. Qeyd edək ki, bu çəkinin finalında Səbuhi Axundovla Rəsul Səmədli qarşılaşıb. Riqada ikinci dəfə baş tutan Azərbaycan finalı Axundovun qələbəsi ilə bitib. Bununla da Axundov birinciliyin qızıl, Səmədovsa gümüş medalını qazanıb. Daha bir gümüşü yalnız həlledici finalda məğlub olan Əli Qaziməmmədov (81 kq) əldə dib. Cəsur İbadlı (73 kq) və Mehti Abbasovsa (81 kq) çıxışını 3-cü yerdə bitirməklə bürünc medala layiq görülüb. Bununla da Azərbaycan yığması iki günlük Avropa birinciliyini 12 (4-3-5) medalla baça vurub. Bununla da Azərbaycan oğlanların komanda hesabında birinci yeri tutub. 

Xatırladaq ki, birinciliyin start günü isə 50 kq-da həmyerlilərimiz Bahadur Feyzullayev lə Rüstəm Qasımzadə arasında Azərbaycan finalı baş tutmuşdu. Ümumiyyətlə yığmamız start günü 7 (3-1-3) medal qazanmışdı. 

İNTİQAM Məmmədov