CÜDO

-------------

"Böyük Dəbilqə"nin ilk günü cüdoçularımızdan yalnız Leyla Əliyeva medal qazanıb

Bu gün Abu-Dabidə (BƏƏ) kişi və qadın cüdoçular arasında cari mğvsümün son "Böyük Dəbilqə" turnirinə start verilib. Turnirin ilk günü Azərbaycan yığmasının 4-ü qadın olmaqla 8 üzvü tatamiyə çıxıb. Təəssüflər olsun ki, cüdoçularımızdan yalnız Leyla Əliyeva (48 kq) mükafatçılar sırasında yer ala bilib. Qeyd edək ki, start görüşündə Mirei Lapuertı (İspaniya), ardından Katarinı Kostanı (Portuqaliya) məğlub edən Leyla yarımfinala yüksəlib. Di gəl ki, cüdoçumuz finala çıxışda İtaliya təmsilçisi Assunte Skutto ilə bacarmayıb. Maraqlıdır ki, bundan sonra isə o, bürünc medal uğrunda görüşdə daha bir italiyalı cüdoçu - Françesku Milani ilə qarşılaşıb. Bu dəfə isə cüdoçumuz onu məğlub etməklə həm yarımfinaldakı məğlubiyyətin əvəzini çıxıb, həm də bürünc medal qazanıb. 

Bu gün tatamiyə çıxan digər cüdoçularımıza gəlincə, 66 kq-da çıxış edən Ruslan Paşayev çıxışını bürünc medalın bir addımlığında başa burub. Qeyd edək ki, startda İtaliya, ardından Rusiya daha sonra isə iki ispaniyalı rəqibini məğlub edərək yarımfinala yüksələn Ruslan bu mərhələdə  gürcüstanlı rəqibi ilə bacarmayıb. Bunun ardından isə o, bürünc medal uğrunda qarşılaşmada BƏƏ təmsilçisinə uduzaraq turnirlə əliboş vidalaşıb. Bu çəkidə tatamiyə çıxan digər təmsilçimiz - Kəramət Hüseynovsa ikinci görüşdə fiaskoya uğrayıb. 

60 kq-da mübarizə aparan cüdoçularımızdan Əhməd Yusifov ikinci, Rəvşən Əliyevsə birinci görüşdə büdrəyib. 
52 kq-da mübarizəyə qatılan Aydan Vəliyeva ikinci, daha təğrübəli cüdoçumuz Gültac Məmədəliyeva isə elə ilk görüşdəcə məğlub olaraq, çıxışını erkən başa vurub. 
57 kq- çəki dərəcəsində çıxış edən Fidan Əlizadə də ilk uqarşılaşmadan qalib ayrılsa da ikinci görüşdə mübarizəni dayandırıb. 

İNTİQAM Məmmədov