CÜDO

-------------

Cüdoçularımız Avropa çempionatına yollanıblar

3-5 noyabr günlərində Fransanın Monpelye şəhərində böyüklər (kişi və qadınlar) arasında Avropa çempionatı keçiriləcək. Üç gün davam edəcək çempionatda Azərbaycandan olan tatami ustaları da mübarizə aparacaqlar. Azərbaycan Cüdo Federasiyasından verilən məlumata görə, ölkəmiz qitə çempionatında ikisi qadın olmaqla 11 cüdoçu ilə təmsil olunacaq.

Xatırladaq ki, kişilərdən və qadınlardan ibarət milli yığmanın cüdoçuları Avropa çempionatına hazırlıq məqsədilə İspaniya, Slovakiya və Özbəkistanda keçirilən beynəlxalq təlim-məşq toplanışlarına (TMT) və eləcə də dəfələrlə yerli toplanışlara qatılıblar.

Çempionata qatılacaq yığmamızın heyəti belədir:

Qadınlar : Lyela Əliyeva (-48 kq), Gültac Məmmədəliyeva (52 kq),

Kişilər: Balabəy Ağayev, Turan Bayramov (hər ikisi 60 kq), Yaşar Nəcəfov (66 kq),

Hidayət Heydərov, Rəşid Məmmədəliyev (hər ikisi 73 kq), Zelim Tçkayev (81 kq), Murad Fətiyev (90 kq), Zelim Kotsoyev (100 kq) və Uşanqi Kokauri (+100 kq).

Avropa çempionatında cüdoçulara Azərbaycan Cüdo Federasiyasının vitse-prezidenti Elnur Məmmədli başda olmaqla böyüklərdən ibarət yığmanın baş məşqçisi Riçard Trautman, böyüklərdən ibarət yığmanın böyük məşqçiləri Elçin İsmayılov və Slavko Tekiç, qadınlardan ibarət yığmanın baş məşqçisi Rəşad Məmmədov rəhbərlik edəcək.

İNTİQAM Məmmədov