CÜDO

-------------------

Yalnız Yaşar Nəcəfov bürünc medal uğrunda güləşmək imkanı qazanıb 

Bu gün Fransanın Monpelye şəhərində böyüklər (kişi və qadınlar) arasında cüdo üzrə Avropa çempionatına start verilib. Çemöionatın start günü Azərbaycan yığma komandasının 5 üzvü tatamiyə çıxaraq medallar uğrunda mübarizəyə başlayıb. Qadınlar arasında -48 kq çəkidə Leyla Əliyeva və -52 kq çəkidə Gültac Məmmədəliyeva, kişilərin yarışında isə -60 kq çəkidə Balabəy Ağayev və Turan Bayramov, -66 kq-da Yaşar Nəcəfov güləşib.

Təəssüflər olsun ki, tatami ustalarımızadan yalnız Yaşar Nəcəfov bürünc medal uğrunda mübarizə aparmaq imkanı əldə edib. İlk üç görüşdə İtaliya, Almaniya və Fransa təmsilçisini məğlub edərək yarımfinala yüksələn Nəcəfov burada moldovalı Denis Vyeru ilə bacarmayıb. Finaldan kənarda qalan Yaşar axşam saatlarında bürünc medal uğrunda ukraynalı Boqdan İadovla qarşılaşacaq.

Bu gün tatamiyə çıxan digər təmsilçilərimizə gəlincə, 60 кг-da güləşən Turan Bayramov mübarizəyə qatıldığı 1\8 finalı qələbə ilə başa vursada 1\4 finalda məğlub olaraq, təsəlliverici görüşlərə qatılıb. Amma o, burada da büdrəyərək mübarizəni dayandırıb. Həmin cəkidə cıxış edən Balabəy Ağayev isə mübarizəyə qatıldığı ilk görüşdəcə məğlub olub.

Qadın cüdoçularımızdan 48 кг-da mübarizə aparan Leyla Əliyeva ilk görüşündə dünya reytinqinə liderlik edən Assunte Skuttonu (İtaliya) məğlub etsə də sonradan aldığı zədə üzündən növbəti görüşünə çıxa bilməyib. 

52 kq çəki dərəcəsində çıxış edən Gültac Məmmədəliyeva isə 1\8 finalı qələbə ilə keçsə də 1\4 finalda büdrəyib. Ardından isə təsəlliverici görüşdə uduzub və mübarizəni dayandırıb. 

İNTİQAM Məmmədov