Azərbaycan Respublikasının Gənclər və İdman Nazirliyi, Azərbaycan Respublikasının Gənclər Fondunun dəstəyi ilə Azərbaycan Tələbə Gənclər Təşkilatları İttifaqı tərəfindən "Gənclər Həftəsi" çərçivəsində təşkil olunmuş 2000 nəfər tələbə gəncin iştirak etdiyi şənlik yekunlaşıb.

2 fevral Gənclər Gününə həsr olunmuş “5 G - güclü, güvənli, gümrah, gülərüz gənclik” devizi ilə baş tutan şənliyin əsas məqsədi tələbələr üçün əyləncəli tədbir təşkil etmək, fərqlənmiş tələbələri mükafatlandırmaq, onların imtahan sessiyasından sonra əhval-ruhiyyələrini yüksəltmək idi.

Tələbələr üçün rahat mühit formalaşdırmaq, əyləncəli vaxt keçirməklə yanaşı bir-biriləri ilə şəbəkələşməsinə imkan yaratmaq kimi hədəfləri olan şənlik Azərbaycan Respublikasının Gənclər Fondunun icraçı direktorunun müavini Qədir Xəlilovun açılış nitqi ilə başlayıb. Q.Xəlilov Ulu Öndər Heydər Əliyevin banisi olduğu və cənab Prezident İlham Əliyev tərəfindən uğurla davam etdirilən dövlət gənclər siyasəti haqqında iştirakçıları məlumatlandırıb. Daha sonra UNİCEF-in Azərbaycandakı nümayəndəliyinin rəhbəri Aleks Haykens çıxış edib, “İntern Academy 2022” layihəsinin məzunları təltif edilib və xatirə qrup fotosu çəkilib. Bu gün ölkəmizdə uğurla həyata keçirilən gənclər siyasətinə müstəsna töhfə vermiş tələbə gənclərin hər zaman diqqət mərkəzində olduğu vurğulanıb. 

Ulduz qonaqlar və istedadlı tələbələrin ifasında səslənmiş musiqilər də gənclərin gününü daha da maraqlı və əyləncəli edib. İctimai fəallığı ilə seçilən aktiv, fəal tələbələr, həmçinin Tələbə Gənclər Təşkilatlarının komandasının fəal üzvlərinin iştirakı ilə keçirilən şənlik maraqlı anlarla yadda qalıb. Unudulmaz xatirələr, möhkəm dostluqlar və dəyərli təcrübələr qazandıqlarını bildirən iştirakçılar keçirdikləri əyləncəli anları sosial media hesablarında paylaşıblar.

Qeyd edək ki, əyləncənin təşkili və keçirilməsi zamanı Nazirlər Kabinetinin müəyyən etdiyi qayda və tövsiyələr nəzərə alınmaqla, yalnız COVİD-19 pasportu olan şəxslərin iştirakı təmin olunub.