Bakıda İtalyan təhsil sərgisi keçirildi

26 oktyabr 2025-ci il, Bakıda İtaliyanın aparıcı universitetlərinin iştirakı ilə İtalyan Təhsil Sərgisi keçirilib. Tədbir gənclərə Avropanın ən qədim təhsil sistemlərindən birinə – İtaliya ali məktəblərinə – bir addım daha yaxınlaşmaq imkanı yaradıb.
Sərgidə Roma, Milan, Florensiya və Turin kimi şəhərlərin tanınmış universitetləri təmsil olunub. Hər universitet öz təhsil proqramları, qəbul şərtləri, təqaüd imkanları və tələbə həyatını əks etdirən məlumatlarla çıxış edib.
Ziyarətçilər arasında həm abituriyentlər, həm də magistratura üzrə təhsilini xaricdə davam etdirmək istəyən gənclər üstünlük təşkil edib. Onlar universitet nümayəndələri ilə birbaşa ünsiyyət quraraq təhsil xərcləri, yaşayış şəraiti və tələbə vizası ilə bağlı suallarına cavab tapıblar.

Sərgi çərçivəsində müxtəlif təqdimatlar, sual-cavab sessiyaları və məsləhət guşələri də təşkil olunub. Tədbir gün ərzində yüzlərlə tələbə və gəncin ziyarətinə açıq olub.