Bakıda “Baku Open” beynəlxalq şahmat festivalı keçiriləcək
Azərbaycan Şahmat Federasiyası, Gənclər və İdman Nazirliyinin dəstəyi ilə yenidən Bakıda “Baku Open-2025” Beynəlxalq Şahmat Festivalı keçiriləcək.
Federasiyanın mətbuat xidmətindən bildirilib ki, turnir aprelin 27-dən mayın 6-dək “Baku Crystal Hall” kompleksində keçiriləcək.
Bu il şahmat üzrə 15-ci dünya çempionu, əfsanəvi Vişvanatan Anandla son Azərbaycan çempionatının qalibi Rauf Məmmədov arasında planlaşdırılan görüşə xüsusi diqqət yetirilib. Onların sürətli və blits şahmat görüşləri aprelin 27-dən 30-dək baş tutacaq.
Festival iştirakçıları üç qrupa - A, B və C qruplarına bölünərək İsveçrə sistemi üzrə doqquz turda mübarizə aparacaqlar. Turnirin ümumi mükafat fondu 55 min ABŞ dollarıdır.
