Elman Eldaroğlu:
Əjdaha kimi məğlubedilməz...
Bəzən mənə elə gəlir ki, o, həzrət Musanın məşhur əsasıdır, bu dəfə əjdahaya yox, insana çevrilib…
Əslində elə əjdaha kimi mübariz, əzmli, məğlubedilməzdir. Allah onu yaranışından fərqli yaradıb. Təsəvvür edin ki, on milyon əhalisi olan bir məmləkətdə ürəyi sağda, qaraciyəri solda olan çox az adamlardan biridir. Üstəlik mədəsi, dalaq və böyürəkləri yüz səksən dərəcə bucaq altında ənənəvi yerindən kənara çıxmış vəziyyətdədir. Xarakterinə gəldikdə isə mülayim, davranışında mədəni, təmkinli, eyni zamanda çox dinamikdir. Daim hərəkətdə olmağı xoşlayır. İdeyaları o qədər çoxdur ki, hər birini həyata keçirə bilsəydi, ölkədə ən məşhurlardan biri olardı. Yazıb yaratmaq təşnəsi onu heç vaxt rahat buraxmır, gözəl qələmi var. İstedadı çoxşaxəlidir, amma bu xəzinəni kəşf edib, layihələrini həyata keçirməsində ona yardım etmək istəyən adam yoxdur. Kaş həzrət Musa sağ olaydı...
Deyir ki,- “Əgər Allah mənə yazmaq qabiliyyəti veribsə, artıq bu, uğurdur. Sənədli film sahəsində peşəkaramsa, bu da bir uğurdur. Qaldı rəsmi göstəricilərə: Lider televiziyasında ərsəyə gətirdiyim filmlərə görə, “Zərdabi” mükafatı almışam. 2002-ci ildə Nizami Gəncəvi ili ilə bağlı Sumqayıt Dövlət Dram Teatrında dövlət sifarişi ilə şairin fikir konsepti əsasında "Xəzinə" adlı iki hissəli pritçam hazırlanıb və bu günə kimi tamaşaçıları cəlb edir. Zəfər bayramını tərənnüm edən "Missiya" qəhrəmanlıq dramım da uğurlu səhnə taleyi yaşayıb. Hər ay repertuar planına salınır. Hər iki tamaşanın rejissoru teatrın baş rejissoru, Xalq artisti Firudin Məhərrəmovdur. Gəncə Dövlət Kukla Teatrında isə əməkdar artist Fərmayıl Paşayevin traktovkasında, Zulfiyyə Əliyevanın ifasında "Dərdlərimin çamadanı" monotamaşam hazırlanıb və yüksək səviyyədə qarşılanıb. Türkiyədə də Azərbaycan tetrında səhnələşdirilən işlərim bəyənilib. Bunu hələlik sirr kimi saxlamağa üstünlük verirəm. Və bir də təmiz adımı qoruyub saxlamışamsa, bunu da bir uğur hesab edirəm...”
Haqqında söhbət açdığım Hafiz Eynullayev bir vaxtlar Nəzərli, İmamnəzərli imzaları ilə tanınsa da, bu gün Ataxanlı təxəllüsü ilə çalışır. “Moskva göz yaşlarına inanmır” filmindəki çilingər Qoşa kimi… 1966-ci il, aprelin 22-də Yardımlı rayonu, Ostair kəndində dünyaya gəlib. Orta təhsilini başa vurduqdan sonra Bakıya üz tutub. Mədəniyyət və İncəsənət Unuversitetini bitirərək, kütləvi tamaşalar rejissoru ixtisasına yiyələnib. 1985-1987-ci illərdə Latviyada hərbi xidmətdə olub. Hərbi xidmət vaxtı “Çasovoy Rodina” və “Za Rodina” qəzetlərində yazıları ilə çıxış edib. Hərbi jurnalistikada təhsil almaq təklifi alsa da, o, bundan imtina edib...
Tələbəlik illərindən AzTv-də süjetlər hazırlayıb. 1991-ci ildə “Azərbaycanfilm” kinostudiyasında direktorun köməkçisi kimi əmək fəaliyyətinə başlayıb. Sonradan AzTv-nin “Gənclık” baş redaksiyasında, “Telefilm” yaradıcılıq birliyində redaktor, “Xəbər” xidmətində xüsusi müxbir, Sumqayıt Dövlət Dram Teatrında ədəbi işlər üzrə rəhbər, “Dünya” televiziyasında baş redaktor, “Dolab- İnterkinovideo” şirkətində baş direktor, “Lider” televiziyasında, “Azərbaycan” sənədli filmlər departamentində redaktor, baş redaktor, “İctimai Televiziya”da redaktor, “Spase” televiziyasında redaktor, “AzTv- Mədəniyyət” kanalında baş redaktor müavini vəzifələrində çalışıb. Hazırda “Dövlət Film Fondu”-nda işləyir. Eyni zamanda “Yaddaş”, “Salnamə” studiyalarında, “Butafilm” şirkətində, ADA Universitetində, DSX-da və bir çox özəl studiyalarda çəkilən filmlərin ssenari müəllifi, rejissoru, prodüseri olub. 1999-cu ildən AYB nin üzvüdür. “Yardımlı Xeyriyyə Cəmiyyəti”-nin maddi dəstəyi ilə “Başsağlığı və doğum haqqında şəhadətnamə” adlı hekayə və povestlərdən ibarət kitabı çıxıb. “Mir Cəlal dünyası" kitabını rus dilindən tərcümə edib. Ona yaxın kitabın redaktorudur, İki pyesi Sumqayıt Dövlət Dram Teatrında, bir monotamaşası Gəncə Dövlət Kukla Teatrında hazırlanıb...
“Ədəbiyyata, qələmə vicdanla xidmət etmək mənim həyat kredomdur. Tvlərdə işlədiyim vaxtlardan üzü bəri gənclərin doğru yola istiqamətlənməsinə, püxtələşməsinə hər zaman yardımçı olmuşam. Müəllim olmasam da belə, yetişmiş tələbələrim çoxdur və onların uğuru ilə qürur duyuram. Hesab edirəm ki, milli- mənəvi dəyərlərə sadiq qalmaq, milli mədəniyyəti peşəkar formada təbliğ etmək, sözün müqəddəsliyini qorumaq xidmətdir…”- söyləyir.
Arzuları çoxdur. Onların həyata keçməsi üçün hər gün qıldığı namazda Allaha dua edir. Ən böyük arzusu isə “Azərbaycanın Əməkdar incəsənət xadimi” fəxri adına layiq görülməkdir. Amma dilinə gətirmir, təvazökarlıq edir. Düşünür ki, qismətdən artıq yemək olmaz. Allahın onun üçün yazdığı ssenari nədirsə o cür də olacaq...
Deyir ki,- “59 yaşım var, istənilən gənclə kreativ düşüncəyə görə mərcə girə bilərəm. Axı kreativ düşüncə arzular bolluğu yaradır. Azərbaycan kinosunu “Oskar”lı görmək istəyirəm. Təbii ki, birinci növbədə müasir milli kino sənayemizin konsepsiyası olmalıdır. Əlimərdan bəy Topçubaşov haqqında ADA Universitetinin sifarişi ilə sənədli film çəkmişəm. Amma bədii filmlik materiallar və ideyalar qalıb qışqırır. Zəfər günü ilə bağlı “Payızın 44 anı” bədii filmi barədə düşünürəm. Gəncə üsyanı və Difailərlə bağlı bədii filmlərin ssenarisini yazmaq təşnəsi də məni rahat qoymur. “Mən səndən ayrılmazdım” adlı bədii filmin tretmenti hazırdır. Türkiyə ilə müştərək olmalıdır. İki qardaşdan böyüyünü Türkiyədən Mustafa Uzunlar, kiçik qardaşı Azərbaycandan Əbdülqəni Əliyevin oynaması nəzərdə tutulub. Amma təəssüf ki bu hələ bir arzu olaraq qalır. Bir də teatrlarımızda yeni bir sistemin qurulmasını arzulaylram. Teatrda menecment- prodüser sistemi qurulmalıdır. Baş prodüser olmalıdır Ədəbi hissə müdirlərinə əsər seçimi üçün sərbəstlik verilməlidir. Azərbaycanda tez-tez beynəlxalq festivallar keçirilməlidir. Amma obyektivlik birinci meyar olmalıdır. Münsifin tələbəsi və ya özəl teatr studiyası müsabiqəyə iş təqdim edibsə, o münsufdən hansı ədalətli rəy gözləmək olar? İllah da bizdə, yəni formalizm xatirinə yox, teatrın inkişafı naminə atılmalıdır bütün addımlar…”
Gənclərə tövsiyəsi isə ağsaqqalyanədir:- “Özünüzdən müştəbeh olmayın, sadə olun, amma bu, o demək deyil ki, statusunuzu, öz qədrinizi bilməyəsiniz. Mənəm-mənəm deməyin, çünki Yunus Əmrə yazırdı ki,- “Ana bətnindən gəldik bazara, kəfən alaraq dönək məzara”. Kəfən bazarlığında hansı yekəxanalığdan danışmaq mümkündür? Rəhmətlik Vaqif İbrahimoğlu demişkən, amma və lakin həm də imkan verməyin ki, nadanlar at oynatsınlar…”
Qəribə hobbisi var- özü xüsusi üsulla dəmlədiyi çaydan içib, araşdırma filmlərə baxır. Həyatda ən çox qorxduğu hadisə isə məntiqsiz adamla mübahisə etməkdir...
“Birdən elə məqamlar olur ki, uşaqlıq illərinə qayıtmaq istəyirəm. Kəndin bütün küçələri, bağ, bostan, örüş, orman, meşə, dağlar gəlir gözlərimin önünə. Yay günündə eyvanda kilimin üstündə ağzıüstə uzanıb poçtalyon İbarətin gətirdiyi qəzetləri oxuyarkən, kənardakı səsləri sanki yenidən eşidirəm. Belə kövrək məqamda Sabir Rüstəmxanlının Yardımlı ilə bağlı şeirlərini oxuyub toxtayıram…”- söyləyir.
Bəli, haqqında sevə-sevə söhbət etdiyim Hafiz Ataxanlı Allahın möcüzələrindən biridir. Möcüzə təkcə onun orqanizmindəki fərqlilikdə deyil, bütövlükdə varlığındadır...
Aprelin 22-si Hafiz Ataxanlının doğum günüdür, 59 yaşı tamam olur. Onu bu münasibətlə təbrik edir, möhkəm can sağlığı, yaradıcılıq uğurları arzulayıram...
Elman Eldaroğlu
* * *
Əşrəf Veysəlli
Müfəssəl və möhtəşəm yazıya görə təşəkkürlər!!! HAFİZ bəyi isə doğum günü və əldə etdiyi nailiyyətlərə görə təbrik edirəm. Bütün arzu və istəklərinə qovuşmağı arzulayıram!
Shahin Shefiyev
Hafiz müəllim haqqında yazdığınız dolğun, əhatəli məqaləyə görə sizə təşəkkür edirəm.Hafiz müəllimin ürəyi, qaraciyəri öz yerində olmasa da, özü yerində olan insandır. Təssüflər olsun ki, bugünə qədər ona layiq olduğu qiyməti verilməyib, amma inanıram ki, gec də olsa,öz qiymətini alacaq. Təbrik edirəm, bağrıma basıram.
Dəniz Sahil
Hafiz müəllimi ilk dəfə tanıyıb ünsiyyət quran hər kəs qısqanclıqmı deyək ya...dilə gətirməsə də onun nə dərəcədə geniş erudisiyaya malik olduğunun fərqindədir.Təəssüf ki, belə mükəmməl insanın irəli getməsinə göz yumulur.Hansı sahədə olarsa -olsun o sahənin tam dərinliyinə qədər varıb uğurlu işlər görmək iqtidarında olan bir ŞƏXSİYYƏTDİR...amma və lakin...
Hafiz müəllim, 60 a gedən yolunuz Sizə bütün istəklərinizin həyata keçməsi üçün bir yanar işıq olsun.
Ayb Sumqayıt Bölməsi
Hafiz müəllim ədəbiyyatımız üçün də,kinomuz,teatrımız və televiziyamız üçün də əvəzsiz kadrdır.Sadə,səmimi,gözəl insani keyfiyyətləri ilə İNSANların qəlbində öz yerini qazanmış,öz dəyəri olan gözəl qələm sahibidir.Uzun ömür,cansağlığı və yaradıcılıq uğurları arzulayıram! Və inanıram ki,bir gün mütləq zəhməti layiqincə dəyərləndiriləcək. Elman sağ ol!
Fazil Abasquluzade
Elman Eldaroğlu bəy, Hafiz Eynullayev haqqında , ona yaxın olan insanların ürəyindən gələnləri qələmə aldığınız görə çox sağolun! Hafiz müəllimə, bitib tükənməyən yaradıcılıq işlərini həyata keçirmək üçün saglam ömür arzulayıram! Yeni yaşın mübarək!
Zakir Imanov
Allah məni xoşbəxt müəllim yaradıb ki,Hafiz kimi yetirmələrim olyb.Hafiz başdan ayağa istedaddır.Onunla saatlarla söhbət etsən də,yorulmazsan.Yerini bilən,səmimi,təvazökardır.Dəyərli Hafiz müəllimi ürəkdən təbrik edir,ona ən yaxşı arzularımı bildirirəm.Yüz yaşa,sağlam yaşa!
Etibar Bennayev
Hafiz qeyri adi istedadlı adamdır. Təbrik edirəm Hafiz bu günün mübarək! Qaldı ki, Elman deyir kaş həzrət Musa sağ olaydı, kaş olaydı məndə istərdim. Dövrümüzdə o müqəddəslərin, "İsa"-ların, "Musa"-ların və s.a. adları daşıyan kişilərin Hafizi görməsini arzu edirəm.
Elman səndə var ol
QEYD. Başlıqlar "Facebook" sosial şəbəkəsindəki başlıqla eynilik təşkil edir.
