2025-ci il Prezident Kubokunda 20-dən çox ölkədən idmançılar iştirak edəcək

Gənclər və İdman Nazirliyinin və Azərbaycan Avarçəkmə və Kanoe Federasiyasının birgə təşkilatçılığı ilə ümummilli lider Heydər Əliyevin anadan olmasının 102-ci ildönümünə həsr olunmuş “Prezident Kuboku-2025” beynəlxalq reqatada 20-dən çox ölkədən nümayəndə iştirak edəcək.

Belə ki, aprelin 28-dən mayın 2-dək keçiriləcək yarışlarda Azərbaycan, Estoniya, Gürcüstan, Almaniya, Yunanıstan, Macarıstan, Hindistan, Qazaxıstan, Qırğızıstan, Latviya, Litva, Moldova, Polşa, Serbiya, Cənubi Afrika Respublikası, İspaniya, Tacikistan, Türkiyə, Ukrayna və Özbəkistandan 200-dən çox idmançı iştirak edəcək.

Aprelin 28-də “Prezident Kuboku-2025” beynəlxalq reqatası çərçivəsində Füzulidəki Köndələnçay su anbarında avarçəkənlərin nümunəvi çıxışları keçiriləcək.

Rəsmi reqata paradı və komandanın təqdimatı aprelin 29-da Mingəçevir şəhərinin Heydər Əliyev prospektində keçiriləcək.

Aprelin 30-da Suqovuşanda reqatanın rəsmi açılış mərasimi və 200 metr məsafəyə qaçış yarışı keçiriləcək.

Reqata mayın 1-2-də Mingəçevirdəki “Kür” Olimpiya Tədris-İdman Mərkəzində davam etdiriləcək. Burada komandalar kayak, kanoe və avarçəkmə üzrə müxtəlif məsafələrdə yarışacaqlar.

Mayın 2-də Mingəçevirdə “Prezident Kuboku 2025” reqatasının bağlanış mərasimi keçiriləcək.