VOLEYBOL

--------------------------

Polina Rəhimova: "Komandaya kömək etmək üçün yenidən buradayam"

Üç illik fasilədən sonra yenidən Azərbaycanın qadın voleybol yığmasının düşərgəsinə dönən Polina Rəhimova AVF-nın rəsmi saytına aşıqlama verib. Son mövsümü Türkiyə çempionatında başa vuran hücumçu komandaya qarşıdakı Avropa çempionatında kömək etmək üçün döndüyünü bilririb. Onun açıqlamasını olduğu kimi təqdim edirik:

”Üç ildən sonra milli komandaya geri döndüm. Avropa çempionatında uğurlu nəticə qazanmaqda komandaya kömək etmək üçün yenidən buradayam. Federasiyada rəhbərlik dəyişib və yeni rəhbərlik mənə etimad göstərdi, bu il yarışda çıxış etmək üçün yenidən milliyə dəvət etdi.

Mayda cərrahiyyə əməliyatı keçirmişdim, hazırda özümü yaxşı hiss edirəm. Bacardığım qədər komandaya kömək etməyə çalışacağam, yaxşı nəticə göstərmək üçün əlimdən gələni edəcəyəm. Məqsədimiz mümkün qədər yaxşı nəticə göstərməkdir. Avropa çempionatında oyunlarımıza bir ay vaxt qalıb. İlk qarşılaşmamız avqustun 18-də olacaq.

Hazırda Bosniya və Herseqovinadayıq. Burada bir neçə yoldaşlıq oyunu keçirəcəyik. Sonra Bakıya qayıdacağıq və yenə hazırlıq matçlarımız olacaq.

Daha sonra Sloveniyanın Maribor şəhərinə gedəcəyik. Orada Avropa çempionatı öncəsi son hazırlığımızı keçib, yoldaşlıq oyunları da oynayıb, heyəti tam formalaşdırıb yarışa hazır olacağıq. Məşqçimiz bir neçə oyun variantı üzərində çalışır. Bu da bizə son taktikalarımızı müəyyənləşdirməyə kömək edəcək.

Bizi dəstəkləyən hər kəsə təşəkkürümü bildirirəm. Yenidən milli komandaya qayıtdığım üçün fanatların bu qədər sevinməsinə görə də çox şadam. Çox adam mənə yazdı, dəstəyini bildirdi. Bu isti qarşılanmaya görə hər kəsə təşəkkürümü bildirirəm, çox sağ olun.

Hər kəsi oyunlara baxmağa dəvət edirəm, gəlin, bizə dəstək olun. Azərbaycan voleybolunu birgə inkişaf etdirək”.

Qeyd: Yığmamız hazırda türkiyəli məşqçi Ataman Güneyligilin rəhbərliyi altında Bosniya və Hersoqovinada təlim-məşq toplanışındadır (TMT). Toplanış zamanı yerli komandayla bir neçə yoxlama görüşü keçirməyi də planlaşdıran yığmamız iyulun 24-də Bakıya dönəcək.

İNTİQAM Məmmədov