ŞAHMAT

--------------------

Rəcəbov mövqeyini qoruyub, Məmmədyarovsa bir pillə irəliləyib

FİDE (Beynəlxalq Şahmat Federasiyası) dünya şahmatçılarının 1 noyabr tarixə olan reytinq cədvəlini elan edib. Kişilərin reytinq cədvəlində 4 şahmatçımız Top-100-də yer alıb ki, onlarında arasında ən yaxşı vəziyyət Teymur Rəcəbova (2745) məxsusdur. O, əvvəlki kimi yenə də 14-cü pillədədir. Yığmanın əsas liderlərindən sayılan Şəhriyar Məmmədyarovsa (2734) bir pillə irəliləməklə 16-cı olub. Bu ilin yayında Bakıda keçirilən Dünya Kubokunda 4-cü yeri tutan Nicat Məmmədov (2679) Top-100-də 53-cü, Rauf Məmmədovsa (2644) 99-cu yerdədir.

Kişilərin reytinq cədvəlinə 2829 xalla norveçli sabiq dünya çempionu və son Duünya Kubokunun sahibi Maqnus Karlsen liderlik edir. ABŞ təmsilçisi Fabiano Karuananın (2795) ikinci olduğu cədvəldə ilk üçlüyü çinli Dinq Liren (2780) tamamlayır.

Qadınlara gəlincə, burada da Top-100-də 4 şahmatçımız yer alıb. Onların arasında isə həmişə olduğu kimi yenə də ən yaxşı vəziyyət Günay Məmmədzadəyə məxsusdur. Aktivində 2441 xalı olan Günay Top-100-də 29-cu yerdədir. Aktivinə 2387 xal yazdıran Ülviyyə Fətəliyeva bir pillə gerdiləməklə cədvəldə 57-ci olub. Gövhər Beydullayeva (2383) 68-ci, Gülnar Məmmədova (2350) isə 94-cüdür. 

Qadınların reytinq cədvəlində ilk 3 yeri isə müvafiq ardıcıllıqla Xou Ufan (Çin, 2632), rusiyalı Aleksandra Qoryaçkina (2567) və Yu Vençjun (Çin, 2560) tutur. 

İNTİQAM Məmmədov