ŞAHMAT

-------------------

Kişi yığmamız AÇ-də növbəti dəfə məğlub olub

Qadınlarımız isə sülh bağlamaqla xal itkisi ilə üzləşiblər

Montoneqronun Budve şəhərində Azərbaycan komandaları da daxil olmaqla 38 kişi və 32 qadın yığmasının iştirakı ilə şahmat üzrə komanda Avropa çempionatı keçirilir. İsveçrə sistemi üzrə keçirilməklə 9 turdan ibarət olacaq qitə çempionatında artıq 4 tur geridə qalıb. Qeyd edək ki, 4-cü tur yığmalarımız üçün uğursuz olub. Belə ki, kişilərdən ibarət yığmamız Xorvatiya komandasına qarşı oyunda 2.5:1,5 hesabla uduzaraq çempionatda ikinci dəfə məğlubiyyət acısını dadıb. İlk 3 turu qələbə ilə başa vuran qadın yığmamız isə hesabat turunda Fransa millisi ilə sülh bağlamaqla ilk xal itkisi ilə üzləşib. Xoşbəxtlikdən bu xal itkisi yığmamızın turnir cədvəlindəki liderlik mövqeyinə təsir etməyib. Çünki, ilk 3 turdan sonra yarış cədvəlinə hərəyə 6 xal toplayan Azərbaycan və Fransa şərikli liderlik edirdi. Hesabat turunda şərikli liderlərin sülh bağlaması Almaniya komandasın da liderlər qrupuna daxil olmasına və  cədvəldə 3 hakimiyyətliliyin yaranmasına imkan verib. İndi qadınların turnir cədvəlinə hərəyə 7 xalı olan Fransa, Azərbayacn və Almaniya liderlik edir. 

Aktivində cəmi 4 xalı olan kişi yığmamız isə 38 komandanın yer aldığı cədvəldə hələki 15-cidir. Burada isə ilk üçlüyü hərəyə 7 xal toplayan Almaniya, Ermənistan və Polşa bölüşür.

Bu gün baş tutacaq 5-ci turda Kişi yığmamız Montoneqro millisiylə, qadın yığmamız isə liderlər qrupunda şəriyi olan Almaniya ilə üzləşəcək. 

Sabah birgünlük fasiləsi olan çempionata noyabrın 20-də 9-cu turla yekun vurulacaq. 

İNTİQAM Məmmədov