Masallıda Vətən Müharibəsi Qəhrəmanının xatirəsi anılıb

Masallı rayonunda Vətən Müharibəsi Qəhrəmanı, şəhid gizir İntiqam Əsgərlinin anım mərasimi keçirilib.

Şəhid Sehran Hacıyev adına Viləş kənd tam orta məktəbində təşkil olunan anım mərasimində Masallı Rayon İcra Hakimiyyətinin başçısı aparatının, SHXÇDX rayon şöbəsinin, təhsil sektorunun məsul işçiləri, şəhid ailələri, qazilər, kənd sakinləri və media nümayəndələri iştirak ediblər.

Tədbir öncəsi Dövlət Himnimiz səsləndirilib, şəhidlərimizin əziz xatirəsi bir dəqiqəlik sükutla yad olunub.

Masallı RİHB aparatının nümayəndəsi Zahid Sadıqov, Viləş kənd İƏD üzrə nümayəndəsi Alim Ələmov, rayon təhsil sektorunun məsləhətçisi Hörmət Balakişiyev, Vətən müharibəsi iştirakçısı Bəxtiyar Salayev, Viləş kənd tam orta məktəbinin direktoru Ehtiram Abasov, tarix müəllimi Raqil Babayev və başqaları Müzəffər Ali Baş Komandan İlham Əliyevin rəhbərliyilə qazanılan tarixi Qələbədən, ordu-xalq birliyindən,  İntiqam Əsgərlinin qəhrəmanlığından danışıblar.

İki şəhid anası Ziba Əsgərova qəhrəman övladı ilə bağlı xatirələrini bölüşüb, tədbirin təşkilatçılarına minnətdarlığını bildirib.

Viləş kənd yaradıcılıq evi və kitabxanasının, Masallı incəsənət məktəbinin əməkdaşlarının, eləcə də kənd məktəbinin şagird və müəllimlərinin iştirakı ilə ədəbi-bədii kompozisiyalar nümayiş etdirilib, nəğmələr səsləndirilib.

Məlumat üçün bildirək ki, İntiqam Bayram oğlu Əsgərli 16 avqust 1990-cı ildə Masallı rayonunun Kalinovka (indiki Viləş) kəndində anadan olub.

2008-ci ildə S.Hacıyev adına Viləş kənd tam orta məktəbini əla qiymətlərlə bitirib.

Türkiyədə kəşfiyyat kursunda olub, bu sahənin incəliklərini öyrənib.

O, Aprel döyüşlərində iştirak edib. Qardaşı Nurlan Əsgərli Aprel döyüşlərində şəhid olub. Qardaşının cansız bədənini döyüş meydanından çıxaran İntiqam bir gün onun intiqamını alacağına söz verib. Qəhrəman gizir Şuşa döyüşlərində sözünü tutub, şəhid qardaşının qisasını aldı. Bu yolda özü də şəhidlik zirvəsinə ucaldı.

İntiqam Əsgərli 2020-ci ildə Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi üçün başlanan Vətən Müharibəsində Şuşa istiqamətində gedən şiddətli döyüşlərdə qəhrəmancasına şəhid olub.

Şəhid İntiqam Əsgərlinin nəşi 17 noyabr 2021-ci il tarixdə doğma kəndində torpağa tapşırılıb.

Ailəli idi. Nur və İntiqam adlı iki övladı yadigar qalıb.

Respublika Prezidentinin müvafiq Sərəncamlarına əsasən şəhid gizir İntiqam Əsgərli Vətən Müharibəsi Qəhrəmanı adına və bir neçə medala layiq görülüb.

Masallı şəhərində və Viləş kəndində küçələrdən biri İntiqam Əsgərlinin, eləcə də kənddəki mərkəzi küşə Aprel şəhidi Nurlan Əsgərlinin adını daşıyır. Masallı şəhəri 3 nömrəli tam orta məktəbinə Vətən Müharibəsi Qəhrəmanı İntiqam Əsgərlinin adı verilib.

Akif AĞAYEV