Lənkəran teatrının aktyoru respublika bədii qiraət müsabiqəsində mükafata layiq görülüb

Mədəniyyət Nazirliyi və Azərbaycan Teatrlar Xadimləri İttifaqının birgə təşkilatçılığı ilə müasir, müstəqil Azərbaycan dövlətinin qurucusu, Ümumilli Lider Heydər Əliyevin yüzillik yubileyinə həsr olunmuş “Sən elə bir zirvəsən...” adlı bədii qiraət müsabiqəsi keçirilib.

Tədbir Heydər Əliyevin həyat və fəaliyyətini əks etdirən videoçarxın nümayişi ilə başlayıb. 

Teatr  Xadimləri İttifaqının sədr müavini, Xalq artisti, Dövlət mükafatı laureatı Hacı İsmayılov dövlətçilik səlnaməmizdə silinməz iz qoyan, azərbaycanlı olması ilə hər zaman fəxr edən milli qürur və iftixar mənbəyimiz olan, Heydər Əliyevin keçdiyi şərəfli ömür yolundan söz açıb, müsabiqənin əhəmiyyətindən danışıb. 

Qeyd edib ki, “Sən elə bir zirvəsən...” bədii qiraət müsabiqəsinin keçirilməsində əsas məqsəd Ulu Öndərə həsr olunmuş ədəbi-bədii nümunələri təbliğ etmək, habelə, milli mədəniyyət məkanında baş verən yaradıcılıq proseslərini fəallaşdırmaq, bədii qiraətə olan marağı artırmaq və yeni yaradıcılıq axtarışına şərait yaratmaqdan ibarətdir.

Sonra müsabiqədə iştirak edən bədii qiraətçilər Ulu Öndərə həsr olunmuş şeirləri böyük sevgi və ehtiramla təqdim ediblər. 

Müəllifi Fəridə Ləman olan “Onu zaman seçib” adlı poemanı səsləndirən Lənkəran Dövlət Dram Teatrının aktyoru Saleh Əzimzadənin çıxışı münsiflər heyəti tərəfindən yüksək qiymətləndirilib. 
Müsabiqənin yekununda mükafatlandırma mərasimi olub və Saleh Əzimzadə münsiflər heyətinin xüsusi diplomu ilə təltif olunub.