NƏRİMAN İSMAYILOV:

Bakı Musiqi Akademiyasının müəllim heyəti Estoniyada işgüzar səfərdə olublar

2023-cü il 17-25 aprel tarixlərində Üzeyir Hacıbəyli adına Bakı Musiqi Akademiyasının “Tarix-nəzəriyyə” fakültəsinin dekanı, Əməkdar müəllim, sənətşünaslıq doktoru, professor Gülzar Mahmudova və “Azərbaycan Ənənəvi musiqisi və müasir texnologiyalar” kafedrasının müəllimi, bəstəkar Azər Hacıəsgərli Estoniya Musiqi və Teatr Akademiyasında, Erasmus proqramı çərçivəsində işgüzar səfərdə oldular. Səfər zamanı akademiyanın bəstəkarlıq və musiqişünaslıq ixtisasları üzrə tədris proqramları ilə tanış olub, dərslərdə iştirak etdilər.

Estoniya Musiqi və Teatr Akademiyasında Bəstəkarlığın tədrisinin yeni müasir istiqamətləri ilə tanışlığın əsas məqsədi - Bakı Musiqi Akademiyasının bəstəkarların təhsil proqramına elektron musiqi, audio-vizual bəstəkarlıq kimi fənnləri daxil edilməsi olmuşdur. Əməkdaşlarımız daha sonra Estoniya Musiqi və Teatr Akademiyasının prorektorları Margus Partlas və Henry-David Varema ilə görüş keçirdilər. Görüş çərçivəsində bəstəkarlıq və musiqişünaslıq ixtisasları  üzrə yeni tədris fənnləri haqqında müzakirələr aparılmışdır.

Əlavə olaraq "Commute" musiqi texnologiyaları festivalında audio vizual sahədə bəstəkar Azər Hacıəsgərlinin iki əsəri səslənmişdir. Festivalda Estoniyadan, İtaliyadan, Litvadan, Danimarkadan və bir çox ölkələrdən olan bəstəkarlar çıxış etmişlər.