Tanınmış uşaq yazıçısı, şair Gülzar İbrahimova ilə görüş keçirildi 

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının Uşaq şöbəsi Azərbaycan Milli Konservatoriyası tərkibində Respublika İncəsənət Gimnaziyası ilə birlikdə yazıçı, şair, AYB-nin və AJB-nin üzvü, H.B.Zərdabi mükafatçısı, Prezident təqaüdçüsü Gülzar İbrahimova ilə  görüş keçirdilər. 

Görüşdə Gülzar İbrahimova şagirdlərlə maraqlı söhbət apardı, yeni yazılan nağıl və şeirləri ilə onları tanış etdi.

Tədbiri kitabxananın əməkdaşları Sevil Namazova və İradə Hüseynova  açaraq bildirdilər ki, uşaqların mütaliə vərdişlərinin təkmilləşdirilməsi və onlarda mütaliə mədəniyyətinin formalaşdırılmasında ədiblərlə görüşlərin keçirilməsi çox önəmlidir. Mənsur şeir yazarı, uşaqlar arasında nağıl yazarı – "Gülzar nənə" kimi tanınan və sevilən Gülzar İbrahimova uşaqlar üçün maraqlı əsərlər yazır.

Gimnaziyanın müəllimləri Xanım Dadaşova, Nərmin Teymurova və Ramella Əliyeva çıxışlarında qeyd etdilər ki,  çağdaş ədəbiyyatımızda özünəməxsus yeri olan Gülzar İbrahimova uşaq ədəbiyyatının təbliğatçısı kimi  geniş oxucu kütləsində maraq doğurur.
Bədii hissədə 2a sinif şagirdləri  Gülzar ibrahimovanın “Əsnadın nağılı” nı səhnələşdirdilər.

2ç sinif şagirdləri “Sülh nəğməsi” adlı mahnını ifa etdilər.

2c sinif şagirdləri  hekayə və nağılları əsasında qurduqları səhnəcikləri təqdim etdilər.   Məktəbin şagirdi yazıçının Azərbaycanın Milli Qəhrəmanı Çingiz Mustafayevaya həsr etdiyi  “Qoy Dünya tanısın” adlı şeirini söylədi və Çingiz Mustafayevin şəklini çəkdi.
Şagirdlər rəngarəng rəqs nömrələri ilə çıxış etdilər.

Gimnaziyanın direktoru Aytən Əhmədova çıxış edərək uşaqların inkişafında söz, sənət nümayəndələri ilə görüşlərin əhəmiyyətini qeyd edərək G.İbrahimovaya yaradıcılıq uğurları arzuladı.

Tədbirin sonunda yazıçı Gülzar İbrahimova tədbir iştirakçılarına təşəkkürünü bildirib, tədbirdə iştirak edən bütün məktəblilərə müəllifi olduğu kitablarından hədiyyə etdi.