GÜLƏŞ

--------------------------

Yeniyetmə güləşçilərimiz Avropa birinciliyinə 2 medalla başlayıblar

Dünən İstanbulda (Türkiyə) 17 yaşlı (U-17) yeniyetmələr arasında güləş üzrə Avropa birinciliyinə start verilib. "Klassiklər"in (yunan-Romaçılar) çıxışı ilə başlayan birinciliyin ilk günü 5 güləşçimiz mübarizəyə qatılıb. Beşliyə daxil olan təmsilçilərimizdən ikisi daha uğurla mübarizə apararaq, mükafatçılar sırasında yer alıb. Ən yaxşı nəticəni isə yalnız həlledici görüşdə məğlubiyyətlə üzləşən Yusif Əhmədli (65 kq) göstərib. O, çıxışını ikinci yerdə bitirməklə gümüş medala layiq görülüb. Medal qazanan digər təmsilçimiz - Elnar Ziyadovsa (48 kq) bürünc medalla kifayətlənib. Təəssüflər olsun ki, 80 kq-da çıxış edən güləşçimiz Elmin Əliyevsə bürünc medal uğrunda görüşdə uduzaraq, çıxışını medalın bir addımlığında başa vurub.

Bu gün isə daha 5 təmsilçimiz döşək üzərinə çıxıb. Onlardan isə ikisi - Turan Daşdəmirovla (45 kq) Roman Kərimov (60 kq) finala yüksəlib. Mikayıl İsmayılov (92 kq) yarımfinalda büdrəyərək finaldan kənarda qaldığı üçün sabah birbaşa bürünc medal uğrunda görüşə çıxacaq. Əli Seyidəlili (51 kq) isə sabah bürünc uğrunda mübarizəyə təsəlliverici görüşlərdən qatılacaq. 

İNTİQAM Məmmədov