FUTBOL

-----------------

İngiltərə millisinin və "Arsenal"ın sabiq futbolçusu Teo Uolkott karyerasını bitirir

34 yaşlı futbolçu karyerasını başa vurduğunu sosial şəbəkədə açıqlayıb.

Teo Uolkottun karyerasında sonuncu klub məzunu olduğu “Sauthempton” olub.

Futbolçu pərəstişkarlarına mesaj göndərib.

“10 yaşımda ayaqqabı geyindiyim ilk an mənim üçün xüsusi bir səyahətin başlanğıcı oldu. Dostlarla parkda oynamaqdan tutmuş dünyanın hər yerində böyük izdihamın qarşısında ən böyük stadionlarda oynamağa qədər. Bu müddət ərzində mənə göstərilən dəstək hər mənada inanılmaz oldu və buna görə səmimi qəlbdən minnətdaram. Mən futbol sahəsini çoxlu böyük oyunçularla paylaşmışam və çoxlu unudulmaz xatirələrimiz var. Oynamağa davam etmək təklifi aldığım üçün bəxtim gətirdi. Amma mən karyeramı başladığım yerdə bitirməyi və çəkmələrimi asmağı düzgün hesab edirəm. Bu yolda mənimlə olan hər kəsə təşəkkür edirəm”, – Teo Uolkott yazıb.

Uolkott karyerasının çox hissəsini Londonun “Arsenal”ında keçirib. Futbolçu London komandasının heyətində 397 matçda iştirak edib, 108 qol vurub, 80 məhsuldar ötürmə edib. Teo İngiltərə millisində 2006-cı ildə 17 yaş 75 günlük debüt etdi. Milli komandanın heyətində Uolkott 47 oyun keçirib və 8 dəfə rəqib qapısına zərbə endirib.