BASKETBOL. 3X3. DQS

------------------------

"Neftçi" DQS-nın 1\4 finalına yüksəlib

Yığmamız isə yenə də mübarizəni erkən dayandırıb

Dünən İspaniyanın Melilye şəhərində qadınlar arasında 3x3 basketbolu üzrə Dünya Qadın Seriyasının 17-ci mərhələsinə start verilib. Xəbər verdiyimiz kimi, iki gün davam edən yarışda ölkəmiz iki komandayla - həm yığma. həm də "Neftçi" klubu ilə təmsil olunub. Təəssüflər olsun ki, "Neftçi"dən fərqli olaraq, yığmamız yenə də turnirlə erkən vidalaşıb. Qeyd edək ki, heyətində Sali Əl-Xuri, Tatyana Deniskina. Ləman İbrahimova və Mersedes Uoklerin yer aldığı yığmamız mübarizə apardığı D qrupunda əvvəlcə İspaniya millisinə (6:22), ardından isə Çinin "Yunda" klubuna (9:21) məğlub olub. 

Heyəti Erika Karter, Brianna Freyzer, Aleksandra Mollenxauer və Dina Ulyanovadan ibarət dördlüyün cəmləşdiyi "Neftçi" klubu yer aldığı B qrupunda "Düsseldorf" (Almaniya) klubuna (13:14) minimal hesabla məğlub olsa da, Portuqaliya millisi üzərində inamlı qələbə qazanıb - 21:17. Bu qələbə isə "Neftçi"yə mübarizəni 1\4 finalda davam etdirmək imkanı verib. Ağ-qaralar bu gün mübarizəni 1\4-dən davam etdirəcək. 

Xatırladaq ki, geridə qalan 16 mərhələ yarışından sonra Şuşa və Netani (İzrail) mərhələsinin qalibi olmuş "Neftçi" 511 xalla yarış cədvəlində ilk üçlüyü tamamlayır. Aktivində cəmi 143 xalı olan millimiz isə 23-cü yerdədir. 

İNTİQAM Məmmədov