Tahir Süleymanov:

Heyətin komplektləşməsində problemlər olsa da, futbolçular meydanda birlik göstərdi

İstənilən komandada xarakterin göstərilməsi, çətin anlarda futbolçuların önə çıxması, kollektivin möhkəmlənməsinə gətirib çıxarır, qələbələr qədər önəmli rol oynayır.

Gənc qapıçı Rza Cəfərov təcrübəsizlikdən etdiyi səhvə görə qırmızı vərəqədən sonra şokdaydı. Futbolçuya ilk dəstək, ürək-dirək verən kapitan Emin Mahmudovla, Yuri Matias oldu. Belə anlarda komanda ruhu bilinir...

Müdafiənin dirəyinə çevrilən Matias liderliyi ələ alaraq komanda yoldaşlarını toparladı. Nəinki qapının toxunulmazlığını qorumaq, 44 nömrə önə atılaraq ikinci topu vurmaqla komandanın özünəinamını artırdı. "Neftçi" bu dəqiqələrdə daha yaxşı təsir bağışlayırdı...

İllər öncə oyunların birində belə bir hadisə baş vermişdi. Elvin Yunuszadənin əsas heyətdə ilk rəsmi oyunu idi. Müdafiədəki fərdi səhvindən fasiləyə geridə yollanmışdıq. 19 yaşlı futbolçumuz gərgin anlar keçirirdi, ya əvəzlənməli, ya da ki...

Flavinyo və təcrübəli futbolçular söz verdilər, "ikinci hissəni gənc oyunçumuz üçün oynayacağıq". Geridönüş edildi, futbolçunun psixoloji sınmasına imkan verilmədi, "Neftçi" görüşü 3:2 qalib bitirdi, sonda isə növbəti çempionluğunu təmin etdi.

Bu gün oyun planında, heyətin komplektləşməsində problemlər olsa da, futbolçular meydanda birlik göstərdi, nəticə ilə birgə, Rzanı da xilas etdilər, gənc qapıçının sabaha olan inamını artırdılar...

Çempionatda ilk qələbə, komanda ruhunun nümayişi, "Neftçi" üçün geridönüş olmalı, yenidən dirçəlməsinə kömək etməlidir. Əsl liderlik keyfiyyətləri ilə seçilən Matias kimi, klubda hər bir kəs bunu dərk etməlidir...

Gənc qapıçı Rza Cəfərova isə həvəsdən düşməməyi, daha əzmlə öz üzərində çalışmasını arzu edirəm. Belə anlarda hər birimiz gənclərə dəstək olmalıyıq...