BASKETBOL. 3X3. DQS

------------------------

Azərbaycan yığması DQS-da Malayziyanı məğlub etsə də Monqolıstanla bacarmayıb 

Bu gün Fransanın Pon-Dyu-Qare şəhərində 3x3 basketbolu üzrə Dünya Qadın Seriyasının sayca 21-ci olan növbəti mərhələsi start götürüb. İki gün davam edəcək bu yarışa Azərbaycan həm yığma komandayla, həm də "Neftçi" klubu ilə qatılıb. "Heftçi"dən fərqli olaraq, heyətində Sali Əl-Xuri, Tatyana Deniskina. Binat Rizvanova və Mersedes Uoklerin cəmləşdiyi Azərbaycan yığması artıq qrup oyunlarını bitirib. Qeyd edək ki, ilk oyunda 21:19 hesabla Malayziyaya qalib gələn yığmamız ikinci matçda Monqolstanla bacarmayıb - 14:22. Bununla belə yığmamızın yer aldığı qrupda ilk iki yerdən birini tutduğu üçün turnirin reqlamentinə uyğun olaraq, 1\4 finala yüksəlib. 

Heyəti Erika Karter, Brianna Freyzer, Aleksandra Mollenxauer və Dina Ulyanovadan ibarət olan "Neftçi" klubu isə bu gün qrupda Misir (saat 19:35) və Hollandiya (21:20) millisi ilə qarşılaşacaq. 

Yeri gəlmişkən geridə qalan 20 mərhələ yarışından sonra 4 mərhələnin (Şuşa, Netani, Melilye və Debretsene)  qalibi olmaqla aktivinə 751 xal yazdıran "Neftçi" yarış cədvəlində 2-ci, 187 xalı olan Azərbaycan yığması isə 22-ci pillədə qərar tutub. 

İNTİQAM Məmmədov